Ind vs SA ODI | भारतासाठी आजचा सामना 'करो या मरो'

पार्ल : सलग दोन कसोटी सामने आणि पहिला एकदिवसीय सामना असे दक्षिण आफ्रिकेविरुद्धचे सलग तीन सामने गमावणारा भारतीय संघासमोर आता एकदिवसीय मालिका राखण्याचे आव्हान आहे. तीन सामन्यांच्या मालिकेतल्या उद्या(ता.२१) होणाऱ्या दुसऱ्या सामन्यात भारताला फलंदाजीचा प्रश्न प्राधान्याने सोडवावा लागणार आहे.(India vs South Africa second match)

गेल्या तिन्ही पराभवांत भारताची फलंदाजी प्रामुख्याने मधली फळी कारणीभूत ठरली आहे. गेल्या दक्षिण आफ्रिका दौऱ्यात कसोटी मालिका २-१ अशा फरकाने गमावल्यानंतर एकदिवसीय मालिकेत भारतीयांनी ५-१ असा विजय संपादन केला होता. यावेळी मात्र मालिका गमाविण्याची स्थिती निर्माण झाली आहे.

कर्णधार बदलला, फॉरमॅट बदलला तरी भारतीय संघाचे प्रश्न कायम राहिले आहेत. अनुभवी शिखर धवन आणि विराट कोहली यांनी भक्कम पायाभरणी केल्यानंतर मधल्या फळीने दगा दिला. त्यानंतर शार्दूल ठाकूरने अर्धशतकी खेळी करून इतर फलंदाजांनी योगदान दिले असते तर विजय मिळवता आला असता हे दाखवून दिले होते, यातून उद्याच्या सामन्यासाठी बोध घेतला जाणार का, हा प्रश्न आहे.

कालचा सामना झालेल्या पार्लच्या मैदानावरच उद्याचाही सामना होत आहे. खेळपट्टीवर गवत नाही, त्यामुळे उत्तरार्धात ती संथ होत जाते, त्यामुळे फटकेबाजी करण्यासाठी वेळ द्यावा लागतो. पहिल्या सामन्यात श्रेयस आणि व्यंकटेश अपयशी ठरले. उद्याच्या सामन्यासाठी लगेचच त्यांना वगळले जाणार नाही, परंतु आपली उपयुक्तता सिद्ध करण्यासाठी त्यांना मोठी खेळी करावी लागणार आहे.

भारतीय फिरकीचेही अपयश

गवतापेक्षा माती दिसत असलेल्या येथील खेळपट्टीवर दक्षिण आफ्रिकेने फिरकीद्वारे आपले आक्रमण सुरू केले आणि मार्करम या बदली गोलंदाजाने केएल राहुलला बाद केले होते. शम्सीने दोन तर केशव महाराजने एक फलंदाज बाद केला होता, या तुलनेत अनुभवी असलेल्या भारताच्या अश्विन आणि युझवेंद्र चहल यांना मिळून एकच विकेट मिळवता आली. लेगस्पिनर चहलविरुद्ध तर बवुमा आणि रॉसी डुसेन या शतकवीरांनी सहजपणे स्विपचा वापर केला होता. त्यामुळे चहलला उद्या संधी मिळाली तर वेगळा मार्ग शोधावा लागणार आहे.