Rohan Bopanna : रोहन बोपण्णाकडून पेसची बरोबरी ; नऊ एटीपी मास्टर्सची फायनल गाठण्याचा पराक्रम

मियामी (अमेरिका) : भारताचा ४४ वर्षीय अनुभवी टेनिसपटू रोहन बोपण्णा याने महान खेळाडू लिएंडर पेसच्या विक्रमाची बरोबरी केली. बोपण्णा याने मॅथ्यू एब्डेन याच्या साथीने मियामी ओपन टेनिस स्पर्धेच्या पुरुष दुहेरीत अंतिम फेरीत प्रवेश केला. याचसोबत नऊ एटीपी मास्टर्स टेनिस स्पर्धेची अंतिम फेरी गाठणारा बोपण्णा हा लिएंडर पेसनंतरचा दुसरा भारतीय टेनिसपटू ठरला हे विशेष.

रोहन बोपण्णा - मॅथ्यू एब्डेन जोडीने उपांत्य फेरीच्या लढतीत मार्सेल ग्रॅनोलर्स - होरासियो झेबालोस या जोडीवर ६-१, ६-४ असा सरळ दोन सेटमध्ये विजय मिळवला आणि अंतिम फेरीत प्रवेश केला. आता जेतेपदाच्या लढतीत बोपण्णा- एब्डेन जोडीसमोर क्रोएशियाचा इवान डोडिग व अमेरिकेचा त्याचा साथीदार ऑस्टीन क्रॅझीकेक यांचे आव्हान असणार आहे.

दरम्यान, याआधी रोहन बोपण्णा याला दुबई अजिंक्यपद स्पर्धेत उपांत्यपूर्व फेरीत, तर इंडियन वेल्स स्पर्धेत अंतिम ३२ फेरीत हार पत्करावी लागली. त्यामुळे त्याची पहिल्या स्थानावरून दुसऱ्या स्थानावर घसरण झाली, पण मियामी टेनिस स्पर्धेची अंतिम फेरी गाठल्यामुळे बोपण्णा याला पुन्हा पहिल्या स्थानावर पोहोचता येणार आहे.

येत्या सोमवारी क्रमवारीत बदल होतील. तेव्हा बोपण्णा पुरुषांच्या दुहेरीत पहिल्या स्थानावर असणार आहे.रोहन बोपण्णा याने गेल्या काही वर्षांमध्ये उल्लेखनीय कामगिरी केली आहे. एटीपी मास्टर्स १००० या स्पर्धेची अंतिम फेरी गाठण्याची त्याची १४ वी खेप होय. तो पहिल्यांदाच मियामी टेनिस स्पर्धेच्या अंतिम फेरीत पोहोचला आहे. एटीपी टूअर स्पर्धांमध्ये त्याने ६३ वेळा अंतिम फेरी गाठली.