Kieron Pollard: ८०० सिक्स अन् 12000 रन्स….कायरन पोलार्डची पाकमध्ये तुफान फटकेबाजी

स्टार अष्टपैलू खेळाडू कायरन पोलार्डने पीएसएल २०२३ मध्ये मुलतान सुल्तान्सकडून खेळताना T20 क्रिकेटमध्ये ऐतिहासिक कामगिरी केली आहे. पोलार्डने लाहोर कलंदर्सविरुद्ध २८ चेंडूंत दोन चौकार आणि तीन षटकारांच्या मदतीने ३९ धावांची धडाकेबाज खेळी केली. यासोबत पोलार्डने टी-२० क्रिकेटमध्ये 12 हजार धावांचा टप्पा पूर्ण केला आहे. इतकेच नव्हे तर 12 हजारहून अधिक धावा करणारा पोलार्ड जगातील तिसरा फलंदाज ठरला आहे. (PSL 2023 Kieron Pollard 800 SIX 12000 runs t20 cricket lahore qalandars vs multan sultans )

कायरन पोलार्ड सध्या पाकिस्तान सुपर लीगमध्ये खेळतोय. त्याने पीएसएलच्या 20 व्या मॅचमध्ये एक महत्त्वपूर्ण टप्पा गाठलाय. पाकिस्तानात खेळताना कायरन पोलार्डने टी २० क्रिकेटमध्ये आपले 800 सिक्स पूर्ण केले. वेस्ट इंडिजचा हा माजी कॅप्टन पीएसएल लीगमध्ये मुल्तान सुल्तांसकडून खेळत होता. त्याने 3 सिक्स मारले.

कायरन पोलार्डचे टी २० क्रिकेटमध्ये ८००सिक्स पूर्ण झाले आहेत. पोलार्डने करिअरमधील ५५० व्या टी २० सामन्यात हा टप्पा गाठला.

यापूर्वी, वेस्ट इंडिजचा माजी सलामीवीर ख्रिस गेल आणि पाकिस्तानचा अनुभवी अष्टपैलू खेळाडू शोएब मलिक हे एकमेव फलंदाज आहेत ज्यांनी टी-20 क्रिकेटमध्ये हा टप्पा ओलांडला आहे.

पोलार्डने पीएसएलच्या सामन्यात करिअरमधील दोन महत्त्वाचे टप्पे गाठले. पण तो लाहोर विरुद्ध आपल्या टीमला विजय मिळवून देऊ शकला नाही. लाहोर कलंदर्सने 20 ओव्हर्समध्ये 180 धावा केल्या होत्या. मुल्तान सुल्तांसच्या टीमने 159 धावा केल्या. पोलार्डने सर्वाधिक 39 धावांच योगदान दिलं.