इंग्लंडचे मैदान गाजवण्यासाठी द्रविडचा कोहलीला मोलाचा सल्ला

Indias tour of England : भारतीय संघाचा माजी कर्णधार राहुल द्रविड (Rahul Dravid ) याने इंग्लंड दौऱ्यात दमदार कामगिरीसाठी टीम इंडियाला मोलाचा सल्ला दिलाय. विराट कोहलीला प्लेइंग इलेव्हन निवडताना याचा निश्चितच फायदा होईल. भारतीय संघाला इंग्लंडमध्ये धमाकेदार कामगिरी करायची असेल तर अष्टपैलू रविंद्र जडेजा (Ravindra jadeja) आणि आर अश्विन (R Ashwin) या जोडगोळीला एकत्रितपणे प्लेइंग इलेव्हनध्ये खेळवायला पाहिजे, असे राहुल द्रविडने म्हटले आहे. राहुल द्रविडच्या नेतृत्वाखालीच भारतीय संघाने इंग्लंड दौऱ्यावर शेवटची मालिका जिंकली आहे. इंग्लंड विरुद्धच्या मालिकेसाठी अश्विन आणि जडेजा या दोन फिरकीपटूंना राहुल द्रविड यांनी पहिली पसंती दिलीये.

अश्विन आणि जडेजा दोघांना एकत्रितपणे प्लेइंग इलेव्हनमध्ये स्थान मिळेल का? असा प्रश्न राहुल द्रविड याला विचारण्यात आला होता. यावर ते म्हणाले की, हो नक्कीच. भारतीय संघाला या लाइनअपचा नेहमीच फायदा झालाय. सध्याच्या घडीला अश्विन आणि जडेजा यांच्यामुळे टीममधील ऑल राउंडरचा बॅलन्स उत्तम वाटतो. हार्दिक पांड्या ज्यावेळी बॉलिंग करत नाही त्यावेळी टीम इंडियाकडील जलदगती ऑल राउंडरचा पर्यायच उरत नाही. समर डेजमध्ये खेळपट्टी कोरडी असेल तर भारतीय संघाकडे दोन फिरकीपटूंना खेळवण्याची संधी असेल, असे राहुल द्रविडने म्हटले आहे.

इंग्लंड विरुद्धच्या मालिकेत भारतीय संघासाठी टॉस देखील महत्त्वपूर्ण असेल, असे द्रविडने म्हटले आहे. भारतीय संघाने टॉस जिंकला तर दोन स्पिनरसह खेळण्याचा निर्णय घेणं सहज शक्य होईल. पहिल्या तीन दिवसांत खेळपट्टीही जलदगती गोलंदाजांसाठी उत्तम असली तरी चौथ्या पाचव्या दिवशी फिरकीला साथ मिळेल, अशी भविष्यवाणीही द्रविड यांनी केली आहे. ऑस्ट्रेलिया दौऱ्यावर रविंद्र जडेजा दुखापतग्रस्त झाला होता. परिणामी तब्बल 4 महिने तो संघाबाहेर होता. या दुखापतमुळे त्याला इंग्लंड विरुद्धच्या मायदेशातील मालिकेतही मुकावे लागले होते. त्याच्या अनुपस्थितीत रविंद्र जडेजाने अष्टपैलू खेळीची कामगिरी बजावली होती.