कोण आहे Sakibul Gani? ज्यानं Ranji Trophy मध्ये रचला इतिहास

Ranji Trophy 2022, World Record : बिहारचा 22 वर्षीय फलंदाज साकिबुल गनी याने रणजी ट्रॉफी स्पर्धेत धमाकेदार पदार्पण केलं. दमदार त्रिशतकी खेळीसह त्याने वर्ल्ड रेकॉर्ड आपल्या नावे केला आहे. मिझोराम विरुद्धच्या सामन्यात साकिबुल गनी याने 405 चेंडूत 341 धावा केल्या. पदार्पणाच्या सामन्यात त्रिशतक झळकवणारा तो क्रिकेट जगतातील पहिला फलंदाज ठरलाय. आपल्या विश्व विक्रमी त्रिशतकी खेळीत त्याने 56 चौकार आणि 2 गगनचुंबी षटकारही खेचले.

बिहारच्या डावात पाचव्या क्रमांकावर फलंदाजीला आलेल्या साकिबुल गनीने आणि बाबुल कुमार या जोडीनं पाचव्या विकेटसाठी 538 धावांची भागीदारी रचली. बाबुल कुमार दुसऱ्या दिवसाअखेर 229 धावांवर नाबाद होता. यापूर्वी मध्‍य प्रदेशच्या अजय रोहेरा याने 2019-20 च्या हंगामात हैदराबाद विरुद्ध फर्स्‍ट क्‍लास डेब्‍यू सामन्यात नाबाद 267 धावांची खेळी केली होती. साकिबुल गनीने 387 चेंडूत त्रिशतक साजरे केले. बिहार आणि मिझोराम यांच्यातील सामना जाधवपुर यूनिवर्सिटी कँम्पस मध्ये खेळवला जात आहे. दुसऱ्या दिवशी बिहारी बाबूनं विक्रमाला गवसणी घातली.

भागीदारीचा विक्रम

साकिबुल गनी आणि बाबुल कुमार जोडीनं चौथ्या विकेटसाठी 538 धावांची भागीदारी केली. फर्स्ट क्लास क्रिकेटमधील ही सर्वोच्च भागीदारीपैकी एक आहे. फर्स्‍ट क्‍लास क्रिकेटमध्ये सर्वोच्च भागीदारीचा विक्रम हा श्रीलंकेच्या कुमार संगकारा आणि महिला जयवर्धने यांच्या नावे आहे. या दोघांनी 2006 मध्ये आफ्रिका विरुद्धच्या सामन्यात 624 धावांची भागीदारी केली होती.

रणजी ट्रॉफीतील सर्वोच भागीदारीचा विक्रम हा महाराष्‍ट्राच्या स्‍वप्निल गुगले आणि अंकित बावने या जोडीच्या नावे आहे. या दोघांनी 594 धावांची भागीदारी रचली होती. 1946/47 च्या हंगामात विजय हजारे आणि गुल मोहम्‍मद या जोडीनं बडोदासाठी 577 धावांची भागीदारी केली होती.

कोण आहे साकिबुल गनी

साकिबुल गनी याचा जन्म बिहारमधील मोतीहरी येथे झाला. त्याने ए लिस्ट क्रिकेटमध्ये 14 सामन्यात 377 धावा केल्या आहेत. 11 टी-20 सामन्यात त्याच्या खात्यात 192 धावांची नोंद आहे. 7 आक्टोबर 2019 मध्ये त्याने विजय हजारे ट्रॉफीतून ए लिस्ट क्रिकेटमध्ये पदार्पण केले. 11 जानेवारीमध्ये तो सय्यद मुश्ताक अली ट्रॉफी स्पर्धेत खेळला.