VIDEO : ये तो पंत का स्टाईल है; ललित फटका मारायला गेला अन्..

Ranji Trophy 2022 Delhi vs Tamil Nadu : रणजी स्पर्धेतील दिल्ली आणि तामिळनाडू यांच्यातील सामना गुवाहटीच्या मैदानात रंगला आहे. दिल्लीनं पहिल्यांदा बॅटिंग करताना तामिळनाडूसमोर 452 धावा केल्या. . दुसऱ्या दिवशीचा खेळ संपला तेव्हा तामिळनाडूनं 2 विकेट गमावून 75 धावा केल्या होत्या. दिल्लीकडून अंडर 19 संघाचा कर्णधार आणि सलामीवीर यश धूरनं 113 धावांची खेळी केली. पदार्पणाच्या सामन्यात त्याने दिमाखदार छाप सोडली. त्याच्याशिवाय जॉन्टी सिंधून 71 तर ललित यादवनं सर्वाधिक 177 धावांची खेळी केली.

दिल्लीच्या डावातील 131 व्या षटकात ललित यादव (Lalit Yadav) आणि कुलदीप यादव (Kuldip Yadav) ही जोडी मैदानात होती. एम मोहम्मदच्या गोलंदाजीवर ललित यादवनं मोठा फटका खेळण्याचा प्रयत्न केला. बॉल आणि बटचा संपर्क झाला. पण ललितच्या हातून बॅट सुटली. रिषभ पंतच्या बाबतीत जो सीन दोन तीन वेळा पाहायला मिळाला. अगदी तोच क्षण नव्याने अनुभवायला मिळाला. ललित यादवनं हातून बॅट सुटल्यानंतर सेफ क्रीजमध्ये येण्याला प्राधान्य दिले. सुदैवाने ज्या दिशेला बॅट पडली त्याठिकाणी कोणीच फिल्डर नव्हता. त्यामुळे कोणताही अनुचित प्रकार घडला नाही.

आयपीएलमध्ये पंतच्या नेतृत्वाखालीच खेळणार आहे ललित यादव

आयपीएलच्या मेगा लिलावात दिल्ली कॅपिटल्सने ललित यादवला आपल्या ताफ्यात सामील करुन घेतलं. आगामी आयपीएलमध्ये तो पंतच्या नेतृत्वाखाली खेळताना दिसेल. आपल्या कर्णधाराकडून जी गोष्ट घडली आहे अगदी तिच गोष्ट त्याच्याकडून घडल्याचा कमालीचा योगायोग क्रिकेटच्या मैदानात दिसून आला.