Ruturaj Gaikwad : शतकी खेळी! पुण्याचा ऋतुराज कसोटी संघाचेही दार ठोठावतोय

Ruturaj Gaikwad Century Against New Zealand A : भारताचा मर्यादित षटकांच्या सामन्यातील सलामीवीर ऋतुराज गायकवाडने संधी मिळेल त्यावेळी भारतीय संघाकडून चांगली कामगिरी करण्याचा प्रयत्न केला आहे. आता त्याने भारतीय अ संघाकडून खेळताना न्यूझीलंड अ संघाविरूद्ध तिसऱ्या आणि अंतिम अनऑफिशिअल कसोटी सामन्यात दमदार शतकी खेळी केली.

या शतकी खेळीच्या जोरावर ऋतुराज गायकवाडने भारतीय कसोटी संघाचे दार देखील ठोठावले आहे. दुर्दैवाने ऋतुराजच्या शतकी खेळीनंतरही न्यूझीलंडने पहिल्याच दिवशी भारताचा डाव 293 धावांवर संपवला.

ऋुतारज गायकवाडने गेल्या 24 महिन्यात फार कमी कसोटी सामने खेळले आहेत. मात्र तरी देखील न्यूझीलंडविरूद्धच्या सामन्यात शतकी खेळी केली. या शतकी खेळीत त्याने 12 चौकार आणि 2 षटकार देखील मारले. ऋतुराजने भारताकडून आतापर्यंत 9 टी 20 सामने खेळले आहेत.

त्याने न्यूझीलंड अ विरूद्धच्या कसोटी सामन्यात उपेंद्र यादवसोबत 134 धावांची भागीदारी रचली. उपेंद्र यादवने 76 धावांची खेळी केली. यात 9 चौकार आणि दोन षटकारांचा समावेश होता. मात्र त्यानंतर न्यूझीलंडने भेदक मारा करत 4 बाद 245 धावा करणाऱ्या भारताचा डाव 293 धावात संपुष्टात आणला.

न्यूझीलंडकडून मॅथ्यू फिशरने 14 षटके टाकत 52 धावात 4 विकेट्स घेतल्या. तर जेकब डफी आणि जो वॉकर यांनी प्रत्येकी 2 विकेट घेतल्या. भारत अ संघाचा कर्णधार प्रियांक पांचाळ 5 धावा करून बाद झाला. तर सलामीवीर अभिमन्यू इश्विरन 38 धावा करून बाद झाला. रणजी ट्रॉफीत खोऱ्याने धावा करणाऱ्या सर्फराज खानला आपले खाते देखील उघडता आले नाही. आयपीएल स्टार रजत पाटीदार 52 चेंडूत 30 धावा करून बाद झाला.