शोएब अख्तरने शेअर केला इमोशनल व्हिडिओ, "तकलीफ में हूं दुआएं चाहिए..."

Shoaib Akhtar Surgery: पाकिस्तानचा माजी वेगवान गोलंदाज शोएब अख्तर सध्या ऑस्ट्रेलियात असून त्याच्यावर शस्त्रक्रिया करण्यात आली आहे. ऑस्ट्रेलियातील मेलबर्नमध्ये गुडघ्यावर शस्त्रक्रिया केल्यानंतर शोएब अख्तरने एक भावूक व्हिडिओ शेअर केला आहे. व्हिडिओमध्ये शोएब अख्तर भावूक दिसत आहे. चाहत्यांना त्याच्या प्रकृतीची माहिती देताना म्हणाला की, सध्या मी अडचणीत आहे आणि मला चाहत्यांच्या प्रार्थनांची गरज आहे.

शोएब अख्तरने त्याचा इन्स्टाग्रामवर एक व्हिडिओ शेअर केला आहे. शोएब अख्तरने व्हिडिओमध्ये म्हटले आहे की, दोन्ही गुडघ्यांवर 5-6 तासांची शस्त्रक्रिया झाली. मी संकटात आहे, फक्त तुमच्या प्रार्थनांची गरज आहे. मला आशा आहे की ही माझी शेवटची शस्त्रक्रिया असेल पण तरीही मला वेदना होत आहेत. निवृत्तीच्या 11 वर्षानंतरही मला प्रचंड वेदना होत आहेत. मी आणखी ४-५ वर्षे क्रिकेट खेळू शकलो असतो. पण, मला माहीत होतं की मी हे केलं तर मी व्हीलचेअरवर बसेन. त्यामुळेच मी क्रिकेट सोडले. पाकिस्तानकडून खेळणे ही अभिमानाची बाब आहे. वेगवान गोलंदाजांसोबत असे घडते पण पाकिस्तानसाठी काहीही फरक पडत नाही. मला पुन्हा संधी मिळाली तर मी पुन्हा तेच करेन.

शोएब अख्तरने 224 आंतरराष्ट्रीय सामन्यांमध्ये पाकिस्तानचे प्रतिनिधित्व केले आहे. शोएब अख्तरच्या नावावर 444 आंतरराष्ट्रीय विकेट आहेत. आंतरराष्ट्रीय क्रिकेटमध्ये सर्वात वेगवान चेंडू टाकण्याचा विक्रम शोएब अख्तरच्या नावावर आहे. शोएब अख्तरने 2002 मध्ये न्यूझीलंडविरुद्ध161.3 किमी प्रतितास वेगाने गोलंदाजी करून विक्रम केला होता.