Danushka Gunathilaka: श्रीलंकेच्या फलंदाजाला ऑस्ट्रेलियात केले अटक, बलात्काराचा आरोप

श्रीलंका क्रिकेट दनुष्का गुनाथिलका याला बलात्काराच्या आरोपाखाली ऑस्ट्रेलियातील सिडनी येथे अटक करण्यात आली आहे. रविवारी सकाळी श्रीलंकेचा संघ त्याच्याशिवाय आपल्या देशाला रवाना झाला. (Sri Lanka Cricketer Danushka Gunatilleke Arrested In Sydney T20 World Cup )

मिळालेल्या माहितीनुसार, एका महिलेच्या तक्रारीवरून दनुष्का गुनाथिलकाला अटक करण्यात आली आहे. 31 वर्षीय क्रिकेट स्टारला रविवारी पहाटे 1 वाजता सिडनीच्या पूर्वेकडील ससेक्स स्ट्रीट येथील हॉटेलमध्ये गेल्या आठवड्यात एका कथित घटनेच्या संदर्भात अटक करण्यात आली होती. 29 वर्षीय महिलेने आरोप केला आहे की, गुणथिलकाने घरातच तिच्यावर लैंगिक अत्याचार केले. अशी माहिती पोलिसांनी दिली.

ऑस्ट्रेलियन मीडियानुसार, पोलिसांनी आरोप केला आहे की या महिलेने ऑनलाइन डेटिंग अॅपद्वारे अनेक दिवस दनुष्का गुनाथिलकाशी चॅट केले होते. बुधवारी दोघांची भेट झाली होती. त्यानंतर श्रीलंकेच्या फलंदाजाने महिलेवर लैंगिक अत्याचार केल्याचा आरोप आहे.