US Open 2023 : जोकोविचने जिंकलं 24वं ग्रँडस्लॅम विजेतेपद! यूएस ओपनच्या फायनलमध्ये मेदवेदेवचा केला पराभव

नोव्हाक जोकोविचने यूएस ओपन २०२३चे विजेतेपद पटकावले आहे. जोकोविचने न्यूयॉर्कमधील मार्गारेट कोर्टवर खेळल्या गेलेल्या अंतिम सामन्यात डॅनिल मेदवेदेवचा पराभव करून २४वे ग्रँडस्लॅम एकेरीचे विजेतेपद पटकावले. चुरशीच्या लढतीत सर्बियाच्या ३६ वर्षीय अनुभवी खेळाडूने ६-३, ७-६ (७-५), ६-३ असा विजय मिळवला.

जोकोविचने पहिला सेट ६-३ असा सहज जिंकला. यानंतर दुसरा सेट जोकोविच आणि मेदवेदेव यांच्यात एक तास ४४ मिनिटे चुरशीची लढत झाली. जोकोविचने हा सेट ७-६ ने जिंकला. तिसऱ्या सेटमध्ये जोकोविचने मेदवेदेवचा ६-३ असा पराभव करत विजय मिळवला.

जोकोविचचे यूएस ओपनचे चौथे विजेतेपद

दुसऱ्या क्रमांकाचा खेळाडू असलेला जोकोविच दुसऱ्या सेटमध्ये थोडा अडचणीत आल्यासारखा वाटला पण त्याने सामन्यात पुनरागमन करत चौथे यूएस ओपन जेतेपद पटकावले. या वर्षाच्या सुरुवातीला जोकोविचने राफेल नदालचा २२ ग्रँड स्लॅम विजेतेपदांचा विक्रम मागे टाकला होता. जोकोविचला जुलैमध्ये विम्बल्डनच्या अंतिम फेरीत पराभवाला सामोरे जावे लागले होते. मात्र, त्याने २०२३ मध्ये चारपैकी तीन ग्रँडस्लॅम विजेतेपदे जिंकली आहेत.

जोकोविचने आतापर्यंत ३६ वेळा ग्लँड स्लॅम फायनल खेळला आहे ज्यापैकी २४ विजेतेपद पटकावले आहे. तो १० वेळा ऑस्ट्रेलियन ओपन चॅम्पियन आणि सात वेळा विम्बल्डन चॅम्पियन ठरला आहे. फ्रेंच ओपनचे जेतेपदही तीन वेळा जिंकले आहे.