Maratha Reservation : मराठ्यांचा आक्रोश मुख्यमंत्र्यांच्या ठाणे जिल्ह्यात! सोमवारी दिली ठाणे बंदची हाक

मुंबई - जालना जिल्ह्यातील अंतरवाली सराटी येथे मागील १३ दिवसांपासून मनोज जरांगे पाटील यांच्या नेतृत्वात आंदोलन सुरू आहे. या आंदोलकांवर काही दिवसांपूर्वीच लाठीचार्ज झाला होता. या लाठीचार्जचे राज्यभर पडसाद उमटताना दिसत आहेत. याचं लोन आता मुख्यमंत्री एकनाथ शिंदे यांच्या ठाणे जिल्ह्यात पोहोचले आहे.

या घटनेचा निषेध म्हणून राज्य सरकारचा विरोध करण्यासाठी आणि मराठा समाजाला आरक्षण देण्यासंदर्भात सकल मराठा मोर्चाच्या वतीने सोमवारी ठाणे बंद पुकारला आहे. या संदर्भात ठाण्याच्या शासकीय विश्रामगृह येथे सकल मराठा समाजासह सर्व पक्षीय बैठक पार पडली.

या बैठकीत ठाणे बंद करण्याचा निर्णय एकमताने घेण्यात आला. बैठकीत विविध राजकीय पक्षांशी संबंधित मराठा समाजाच्या संस्था आणि संघटनानी या बंदला पाठिंबा दर्शवल्याची माहिती सकल मराठा मोर्चाचे समन्वयकांनी दिली.

मुख्यमंत्री एकनाथ शिंदे ठाणे जिल्ह्यातील असून या बंदकडे सर्वांचे लक्ष लागले आहे. लाठीहल्लाप्रकरणी शिंदे सरकारने चौकशीचे आदेश दिले असून जबाबदार पोलिस अधिकाऱ्याला सक्तीच्या रजेवर पाठवण्यात आलं आहे. या लाठीचार्जपासून जालन्यातील आंदोलन राज्यभरात चर्चेत आलं आहे.