विराट - रोहितमध्ये पहिल्या टी 20 सामन्यात 'या' रेकॉर्डसाठी होणार फाईट

कोलकाता : भारत आणि वेस्ट इंडीज यांच्यात आजपासून (दि. 16) तीन सामन्यांची टी 20 मालिका सुरू होत आहे. या मालिकेत भारताचा कर्णधार रोहित शर्मा (Rohit Sharma) आणि माजी कर्णधार विराट कोहली (Virat Kohli) यांच्यामध्ये एक मोठे रेकॉर्ड मोडण्यासाठी चढाओढ होण्याची शक्यता आहे. विराट कोहलीने आंतरराष्ट्रीय टी 20 क्रिकेटमध्ये आतापर्यंत 95 सामने खेळले आहेत. त्यात त्यांनी 3227 धावा केल्या आहेत. रोहित देखील विराटच्या फारसा मागे नाही. त्यानेही टी 20 क्रिकेटमध्ये 3197 धावा केल्या आहेत. (Virat Kohli and Rohit Sharma Have a Chance to break Martin Guptill Record)

पहिल्या टी 20 सामन्यात रोहित शर्मा विराट कोहलीला गाठू शकतो. मात्र त्यापेक्षाही या दोघांच्या रडावर असणार आहे तो न्यूझीलंडचा सलामीवीर मार्टिन गप्टील (Martin Guptill). मार्टिन गप्टीलने टी 20 आंतरराष्ट्रीय सामन्यात 3299 धावा केल्या आहेत. तो सध्या आंतरराष्ट्रीय टी 20 सामन्यात सर्वाधिक धावा करणाऱ्यांच्या (Highest runs in T20 International) यादीत टॉपवर आहे. विराट कोहलीला त्याला गाठवण्यासाठी अजून 73 धावांची गरज आहे. तर रोहित शर्मा 102 धावांनी पिछाडीवर आहे. धावांच्या बाबतीत पाहिले तर विराट कोहली गप्टीलचा रेकॉर्ड लवकर मागे टाकू शकतो. मात्र त्याच्या सध्याचा फॉर्म पाहता हे जरा अवघड दिसतंय.

दुसरीकडे रोहित शर्माने जर वेस्ट इंडीजविरूद्धच्या पहिल्या टी 20 सामन्यात शतक ठोकण्याचा भीम पराक्रम केला तर तो विराट आणि मार्टिन गप्टीलला एका खेळीतच मागे टाकू शकतो. सध्या विराट कोहलीकडे कोणत्याही संघाचे कर्णधारपद नाहीये. तो सध्या खराब फॉर्ममधून जात आहे. त्याला वेस्ट इंडीज विरूद्धच्या 3 एकदिवसीय सामन्यात फक्त 26 धावा करता आल्या होत्या.