The Ashes Series 2023: ॲशेस मालिकेचा थरार आजपासून; जाणून घ्या संपूर्ण वेळापत्रक

Ashes Series 2023 ENG Vs AUS 1st Test : भारतीय संघाला हरवून कसोटी अजिंक्यपद मिळवणाऱ्या ऑस्ट्रेलियासाठी हा लौकिक टिकवण्यासाठी इंग्लंडचे मोठे आव्हान पार करावे लागणार आहे. या दोन संघातील प्रतिष्ठेची ॲशेस मालिका आजपासून सुरू होत आहे.

गेल्या दोन कसोटी अंतिम सामन्यात स्थान मिळवण्यास इंग्लंडचा संघ अपयशी ठरला होता. त्यातील एका वर्षात गोलंदाजीची सरासरी न राखल्यामुळे झालेला दंड, परिणामी गुणांमध्ये झालेली कपात त्यांच्या मुळावर आली होती.

आता आजपासून सुरू होणाऱ्या पहिल्या कसोटी सामन्यापासून नव्या कसोटी अजिंक्यपद मालिकेस सुरुवात होत असल्यामुळे इंग्लंडचा संघ नव्या उमेदीने मैदानात उतरेल. काही दिवसांपूर्वी झालेल्या भारत-ऑस्ट्रेलिया सामन्यातून इंग्लंडचे संघ व्यवस्थापन ॲशेस मालिकेची तयार करत होते.

भारतीय संघ गोलंदाजीत कमजोर ठरला होता; परंतु इंग्लंडकडे विख्यात जेम्स अँडरसन, त्याच्या साथीला स्टुअर्ट ब्रॉड, मार्क वूड आणि ऑली रॉबिन्सन असे वेगवान मारा करणारे गोलंदाज आहेत. सोबत फिरकी गोलंदाजीत मोईन अली असेल.

ॲशेस मालिका सुरू होण्यापूर्वी संपूर्ण वेळापत्रक जाणून घ्या -

• पहिली कसोटी 16 ते 20 जून दरम्यान एजबॅस्टन येथे खेळवली जाणार आहे.

• दुसरा कसोटी सामना 28 जून ते 2 जुलै दरम्यान लॉर्ड्सच्या ऐतिहासिक मैदानावर खेळवला जाईल.

• तिसरी कसोटी 6 जुलै ते 10 जुलै दरम्यान हेडिंग्ले येथे होणार आहे.

• चौथा कसोटी सामना 19 जुलै ते 23 जुलै दरम्यान ओल्ड ट्रॅफर्ड येथे खेळवला जाणार आहे.

• पाचवी आणि शेवटची कसोटी 27 ते 31जुलै दरम्यान ओव्हल येथे होणार आहे.

भारतात सामना कधी आणि कसा बघायचा

16 जूनपासून ॲशेस मालिका सुरू होत आहे. पहिला सामना एजबॅस्टन येथे होणार आहे. भारतीय वेळेनुसार हा सामना दुपारी 3.30 वाजता सुरू होईल. सामन्याचे थेट प्रक्षेपण सोनी स्पोर्ट्स नेटवर्कवर पाहता येईल. तुम्‍हाला भारतात त्‍याचे लाइव्‍ह स्‍ट्रीमिंग पहायचे असेल, तर सोनी लाइव्‍ह ॲपवर तुम्‍ही ॲशेसचा आनंद घेऊ शकता.