Hockey Junior Asia Cup : पिछाडीनंतर भारतीय महिलांचा विजय; मलेशियावर २-१ अशी मात

काकामिगाहारा (जपान) : सलामीच्या लढतीत उझबेकिस्तानचा २२-० असा धुव्वा उडवणाऱ्या भारतीय ज्युनियर महिला हॉकी संघाने सोमवारी येथे झालेल्या लढतीत मलेशियावर २-१ असा विजय मिळवला.

भारतीय संघाचा ज्युनियर आशियाई करंडकातील हा सलग दुसरा विजय ठरला. १-० पिछाडीवर असतानाही भारतीय महिला संघाने मलेशियाला २-१ असे नमवले. मुमताज खान व दीपिका यांचे दमदार गोल वैशिष्ट्य ठरले.

मलेशिया व भारत यांच्यामधील लढतीच्या सुरुवातीलाच दोन्ही संघांमध्ये रोमहर्षक लढत पाहायला मिळाली. मलेशियन हॉकीपटू चेंडूचा ताबा आपल्याकडे अधिक ठेवण्यासाठी प्रयत्न करताना दिसले. भारतीय खेळाडूंनी आक्रमण केले. त्यामुळे भारतीयांना पेनल्टी कॉर्नरही मिळाले, पण त्यांना याचे गोलमध्ये रूपांतर करता आले नाही.

डियान नझेरी हिने सहाव्या मिनिटाला मलेशियासाठी गोल केला. हा फिल्ड गोल होता; मात्र मलेशियाला हा आनंद जास्त काळ साजरा करता आला नाही. मुमताज खान हिने दहाव्या मिनिटाला पेनल्टी कॉर्नरवर गोल करीत भारतासाठी बरोबरी साधली. पहिल्या क्वॉटरमध्ये दोन्ही संघांमध्ये १-१ अशी बरोबरी होती.

दुसरा क्वॉटरमध्ये भारताने दुसरा गोल केला. दीपिका हिने २६ व्या मिनिटाला पेनल्टी स्ट्रोकवर गोल करीत भारताला २-१ अशी आघाडी मिळवून दिली. तिसऱ्या क्वॉटरमध्ये भारतीयांना आक्रमक खेळ केला. चेंडूचा ताबा आपल्याकडे ठेवून मलेशियाचा बचाव भेदण्याचा प्रयत्न करण्यात आला, पण या क्वॉटरमध्ये भारत व मलेशिया या दोन्ही देशांना गोल करता आला नाही. चौथ्या क्वॉटरमध्ये मलेशियाने बरोबरी साधण्यासाठी प्रयत्न केले, पण भारतीयांनी सातत्याने आक्रमण केल्यामुळे मलेशियाला या क्वॉटरमध्ये बचावावरच जास्त लक्ष द्यावे लागले.

आता लढत कोरियाशी

दक्षिण कोरियाचा संघ सहा गुणांसह दुसऱ्या स्थानावर आहे. भारतीय संघासमोर उद्या (ता. ६) दक्षिण कोरियाचे आव्हान असणार आहे.