Women's Asian Champions Trophy 2023 : चक दे इंडिया! भारतीय महिला संघाने जपानला ४-० ने हरवून जिंकली चॅम्पियन्स ट्रॉफी

Women's Asian Champions Trophy 2023 : भारतीय महिला हॉकी संघाने रविवारी आशियाई चॅम्पियन्स ट्रॉफी हॉकी स्पर्धेचे विजेतेपद पटकावले. भारतीय महिला संघाने अंतिम सामन्यात जपानचा 4-0 असा पराभव करत सुवर्णपदकाला गवसणी घातली. भारताने दुसऱ्यांदा हे विजेतेपद पटकावले आहे.

रविवारी रांचीच्या मरंग गोमके येथील जयपाल सिंग अॅस्ट्रोटर्फ हॉकी स्टेडियमवर अंतिम सामना खेळला गेला. या विजयानंतर हॉकी इंडियाने ट्विट करून प्रत्येक खेळाडूला तीन लाख रुपये बक्षीस म्हणून देण्यात येणार असल्याचे जाहीर केले. यासोबतच सपोर्ट स्टाफच्या प्रत्येक सदस्याला 1.5 लाख रुपये बक्षीस म्हणून दिले जातील.

कोचनी केले खेळाडूंचे कौतुक...!

भारतीय महिला हॉकी संघाचे प्रशिक्षक जेनेके शॉपमन यांनी सांगितले की, अंतिम फेरीत आम्हाला ४-० ने विजय मिळण्याची अपेक्षा नव्हती. आम्ही खूप आनंदी आहोत. सामना पाहण्यासाठी आलेल्या चाहत्यांनी संघाला खूप प्रोत्साहन दिले. सगळेच उत्साहात होते.

भारताने यापूर्वी 2016 मध्ये सिंगापूरमध्ये पहिले आशियाई चॅम्पियन्स ट्रॉफी जिंकले होते. तर 2013 आणि 2021 चे विजेते जपान आहे.