स्मिता शेवाळे - अभिनेत्री
माझा पहिला चित्रपट ‘यंदा कर्तव्य आहे’. त्यावेळेला रसिका जोशी हे माझ्यासाठी मिळालेलं एक वरदान होतं. तिनं मला निरनिराळ्या गोष्टींचं निरीक्षण करायला शिकवलं. त्यामुळे एक अभिनेत्री म्हणून प्रगल्भ व्हायला मदत झालीच; परंतु माणूस म्हणून घडण्यातही मदत झाली. आम्ही एक नाटक बघायला गेलो होतो, तेव्हा तिनं सांगितलं, की या नाटकात ही जी मुलगी आहे ती अतिशय सुंदर दिसते. खरंतर ग्रीन रूममध्ये ओळख करून दिल्यानंतर मला ती खूप आकर्षक किंवा सुंदर अशी काही वाटली नव्हती. तिच्या दिसण्यात बऱ्याच त्रुटी वाटत होत्या; परंतु त्यानंतर नाटक बघितलं आणि त्या संपूर्ण प्रयोगात ती मला खरोखरच इतकी मोहक आणि आकर्षक वाटली.
