नविन चप्पल, बूट, सॅण्डल चावु नये म्हणुन, हे उपाय करून बघा

आपण मोठ्या हौशीने एखादी नविन चप्पल विकत घेतो  आणि नविन घेतल्या घेतल्या ती चप्पल पायात घातली की लगेच ती हमखास पायाला चावते. हा चप्पलेचा अनुभव तुम्ही आम्ही प्रत्येकाने कधी ना कधी घेतलेलाच असतो. नविन बूट किंवा नविन सॅण्डल घेतले तर ते पायाच्या मागच्या बाजूला म्हणजेच टाचेच्या वरच्या भागात चावतात.

सुरुवातीला चप्पल नविन असते म्हणुन एक- दोन दिवस आपण हा त्रास सहन करतो. पण नंतर मात्र त्या भागावर हळूहळू जखमा होऊ लागतात. त्यामुळे मग ते महागडे बूट चप्पल पायात घालायला नकोसे होतात आणि मग ते घरात तसेच पडून राहतात. म्हणूनच आज आपण असे काही घरगुती उपाय बघणार आहोत त्यामुळे तुम्ही नविन घेतलेले बुट, चप्पल किंवा सॅण्डल ही तुमच्या पायाला चावणार नाही.

● नविन सॅण्डलला किंवा चप्पलला मेणबत्ती घासणे.

नविन आणलेल्या सॅण्डलला किंवा चप्पलला मेणबत्ती घासावी त्यामुळे चप्पल चावण्याचा धोका कमी होतो.

● स्वयंपाक घरातील बटाटा काप

हा उपाय ऐकून तुम्ही नवल वाटेल. पण बटाट्याचे काप खरोखरच चप्पल चावू नये म्हणुन खूप कामी येतील. जेव्हा बूट पायात खूप घट्ट होतो, तेव्हा तो टोचू लागतो. अशा बुटांमध्ये रात्रीच्या वेळी बटाट्याचे काप करून ठेवा. रात्रभर तसेच राहू द्यावे आणि सकाळी ते काप काढून टाकावे. बटाट्यातलं मॉईश्चर हे बुटांना थोडं सैलसर करण्यास मदत करतं. त्यामुळे बूट टोचणं कमी होतं. 

● तुम्ही नविन चप्पल चावण्यापासुन रोखण्यासाठी बॅण्डेजचा वापर करू शकता.

ज्या ठिकाणी चप्पल, बूट किंवा सॅण्डल चावत असेल त्या ठिकाणी त्या बूटाला बॅण्डेज चिटकवून टाका. 3 ते 4 दिवस ते तसेच राहू द्या. त्यानंतर काढून टाकले तरी चालेल. या उपायानंतर बूट पुन्हा चावणार नाही.

● सॅनिटरी नॅपकीन वापर करून सुध्दा तुम्ही बुट चावण्यापासुन रोखु शकता.

नविन बूट ज्या भागात चावतो आहे, त्याच्या आतल्या बाजूने सॅनिटरी नॅपकीनचा एक तुकडा कापून लावा. यामुळे बूट तर टोचणार नाहीच, पण तुमच्या पायांनाही मऊ वाटेल.

● जर तुम्ही नविन घेतलेल्या सॅण्डलचा बेल्ट टोचत असल्यास काय करावे?

बऱ्याचदा सॅण्डलचा मागचा बेल्ट टाचेच्या वरच्या भागात खूप टोचतो. या बेल्टला त्याच रंगाशी मिळतीजुळती लोकर किंवा एखादा धागा गुंडाळला तर पायांना आराम मिळेल.