Rahul Gandhi : भाजपच्या दृष्टीने महिला दुय्यम;दिल्लीतील सभेत राहुल गांधींचे टीकास्त्र

नवी दिल्ली : ‘‘महिलांना दुय्यम दर्जाच्या नागरिकाचा दर्जा मिळायला हवा, असे भाजपला वाटते. त्यांच्या वैचारिक मार्गदर्शक असलेल्या राष्ट्रीय स्वयंसेवक संघाच्या शाखांमध्ये महिलांना प्रवेश नाही,’’ असे प्रतिपादन काँग्रेसचे नेते राहुल गांधी यांनी केले.

मंगोलपुरी येथे आयोजित महिलांच्या सभेत राहुल गांधी बोलत होते. ‘‘भाजपने मोठा गाजावाजा करत महिला आरक्षण विधेयक संसदेमध्ये मंजूर केले पण नंतर त्यांनीच दहा वर्षांनी त्याची अंमलबजावणी करण्याची घोषणा केली,’’ असे राहुल यांनी नमूद केले. लोकसभा निवडणुकीचे सहाव्या टप्प्यातील मतदान २५ मे रोजी पार पडत असून त्यासाठीच्या प्रचाराचा आजचा शेवटचा दिवस होता. राहुल यांनी आज मेट्रोतून प्रवास करताना लोकांशी संवाद साधला.

ते म्हणाले,‘‘ आज प्रवाशांची भेट घेत त्यांची मते जाणून घेतली. दिल्लीमधील मेट्रोसेवा दळणवळणाचे एक प्रभावी माध्यम ठरल्याचे दिसून येते.’’ लोकांसोबत संवाद साधतानाची काही निवडक छायाचित्रे देखील राहुल यांनी समाजमाध्यमांत शेअर केली आहेत. काँग्रेस पक्ष सत्तेमध्ये आला तर आरक्षणामध्येही वाढ करण्यात येईल, यावर घालण्यात आलेली ५० टक्क्यांची मर्यादा शिथिल करण्यात येईल असे राहुल यांनी यावेळी बोलताना सांगितले.

महिलांना मोबदला मिळत नाही

‘‘महिलांना दुहेरी आघाड्यांवर मेहनत करावी लागते, पण त्यांच्या प्रयत्नांची कोणीही दखल घेत नाही. कार्यालयामध्ये काम करून घरी आल्यानंतर त्यांना मुलांची काळजी घ्यावी लागते. स्वयंपाक करावा लागतो. याबदल्यात त्यांना कसलाही मोबदला मिळत नाही. पुरुष हे आठ तास काम करत असतील तर महिला सोळा तास काम करतात. काँग्रेस पक्षाने मात्र महिलांना त्यांच्या कामाचा योग्य मोबदला देण्याचा निर्णय घेतला आहे.’’ असे राहुल यांनी सांगितले.