Nitin Gadkari : '60 वर्षांत जेवढी विकासकामे झाली नाहीत, तेवढ्या कितीतरी पटीने अधिक विकासकामे आम्ही केली'

हुपरी : यंदाची लोकसभा निवडणूक ही उमेदवारांचा नाही, तर ती देशातील जनतेच्या भविष्याचा आणि भवितव्याचा निर्णय करणारी आहे. जनतेच्या भविष्याचे स्वप्न पूर्ण करण्याची ताकद नरेंद्र मोदी सरकारमध्येच आहे. त्यासाठीच भाजप महायुतीला आशीर्वाद द्या. जनतेचे जीवनमान बदलल्याशिवाय आम्ही राहणार नाही, असे प्रतिपादन केंद्रीय मंत्री नितीन गडकरी (Nitin Gadkari) यांनी येथे केले.

हातकणंगले लोकसभा (Hatkanangale Lok Sabha) मतदारसंघातील महायुतीचे उमेदवार धैर्यशील माने यांच्या प्रचारार्थ येथे हुतात्मा स्मारक मैदानावर आयोजित महाविजय सभेत ते बोलत होते. अध्यक्षस्थानी माजी आमदार सुरेश हाळवणकर होते. नितीन गडकरी म्हणाले, ‘गेल्या साठ वर्षांत जेवढी विकासकामे झाली नाहीत तेवढ्या कितीतरी पटीने अधिक विकासकामे आम्ही या भागात केली आहेत. याचे श्रेय मोदी किंवा गडकरींना नाही, तर योग्य सरकारची निवड केली त्या जनतेला आहे. देशाला सुखी, संपन्न, समृद्ध, आत्मनिर्भर आणि अर्थ व्यवस्था बळकट करून देशाला महासत्ता बनविण्याचे स्वप्न आहे.’

आमदार प्रकाश आवाडे म्हणाले, आता कोणीही चिंता करण्याची गरज नाही. जो काही गोंधळ निर्माण झाला होता तो दूर झाला असून, हुपरी भागातील तेरा गावांतून उमेदवारांना मिळणाऱ्या एकूण मतदानांपैकी साठ टक्के अधिक मते धैर्यशील माने यांना देणार आहे. यावेळी श्री. हाळवणकर, डॉ. विनय कोरे, डॉ. अनिल बोंडे, जयदीप कवाडे, जयश्री गाट, ऋषभ जैन, शिवाजी जाधव, सुभाष कागले, अजित सुतार, मंगलराव माळगे, अशोकराव माने, अमित गाट आदींची मनोगते झाली. उमेदवार धैर्यशील माने, पुंडलिकराव जाधव, हिंदुराव शेळके, महावीर गाट, अण्णासाहेब शेंडूरे, ‘गोकुळ’चे संचालक मुरलीधर जाधव, अरुण इंगवले, रजनीताई मगदूम, अजितसिंह मोहिते आदी उपस्थित होते.