Loksabha election 2024 : लोकसभा निवडणुकीचे ब्रँड अ‍ॅम्बेसिडर शंकरबाबा पापळकर साठ मुलांसह सर्वात आधी मतदान केंद्रावर

राज इंगळे

अचलपूर : अमरावती लोकसभा निवडणुकीचे ब्रँड अ‍ॅम्बेसिडर ज्‍येष्‍ठ सामाजिक कार्यकर्ते शंकरबाबा पापळकर यांच्‍या अचलपूर तालुक्यातील वझ्झर येथील स्व. अंबादासपंत वैद्य दिव्यांग, बेवारस बालगृहातील ६० मुलांसह सर्वांत आधी वझ्झर येथील प्राथमिक शाळेच्‍या २१५ क्रमांकाच्‍या मतदानकेंद्रावर पोहोचून मतदानाची सुरुवात केली. मी दिव्यांग मुलांसह मतदान केले, आपणही मतदान करायला जा, असे आवाहन जिल्ह्यातील सर्व नागरिकांना त्यांनी केले.

अनाथांचे नाथ १२५ मुलांचे बाप ज्‍येष्‍ठ सामाजिक कार्यकर्ते शंकरबाबा पापळकर आपल्‍या ६० मुलांसह वझ्झर येथील प्राथमिक शाळेच्‍या २१५ क्रमांकाच्‍या मतदानकेंद्रावर पोहोचले आणि या सर्वांनी मतदानाचा हक्‍क बजावला.

यामध्ये दृष्टिहीन, मूकबधीर व पोलिओग्रस्त मुलांचासुद्धा समावेश आहे. गेल्या १५ ते २० वर्षांपासून ही मुले या बालगृहात राहत आहेत. सर्वांच्या नावापुढे शंकरबाबा पापळकर हेच नाव आहे. आपल्या मुलांना मतदानाचा हक्क मिळावा, यासाठीसुद्धा त्यांनी लढा दिला.

गेल्‍या लोकसभा निवडणुकीत येथील ४८ मुलांनी मतदानाचा हक्‍क बजावला होता. यावेळी सुद्धा ६० मुलांनी मतदानाचा हक्क बजावला. सर्वांत महत्त्वाचे म्हणजे शंकरबाबा यांनी यावेळी मतदान जनजागृतीसाठीही प्रयत्‍न केले. प्रत्‍येकाने लोकशाही समृद्ध करण्‍यासाठी मतदानाचा हक्‍क बजावला पाहिजे, असे आवाहन शंकरबाबा पापळकर यांनी केले.