Kolhapur Loksabha : उद्धव ठाकरे आज शाहू महाराजांच्या भेटीला; नवीन राजवाड्यात होणार रणनीतीवर चर्चा

कोल्हापूर : शिवसेना ठाकरे गटाचे पक्षप्रमुख उद्धव ठाकरे (Uddhav Thackeray) आज (ता. २१) महाविकास आघाडीचे संभाव्य उमेदवार श्रीमंत शाहू छत्रपती महाराज (Shahu Chhatrapati Maharaj) यांची भेट घेणार आहेत. दुपारी साडेतीन वाजता नवीन राजवाडा येथे ही भेट होईल. ठाकरे यांची मिरज (जि. सांगली) येथे आज सायंकाळी जाहीर सभा होणार आहे. त्यासाठी ते कोल्हापुरात विमानतळावर येतील.

तेथून ते मिरजेला जाण्यापूर्वी शाहू महाराजांची भेट घेणार असल्याचे ठाकरे गटाचे जिल्हा संपर्क नेते अरुण दुधवडकर यांनी ‘सकाळ’शी बोलताना सांगितले. कोल्हापूरची शिवसेनेची जागा कॉंग्रेसला (Congress) आणि सांगलीतील जागा शिवसेनेला देण्याचे जवळजवळ निश्‍चित झाले आहे. याच संदर्भातून उद्धव ठाकरे आज मिरज दौऱ्यावर आहेत. तेथे सायंकाळी त्यांची जाहीर सभा होणार आहे.

दुपारी दोनच्या सुमारास ते मुंबईतून कोल्हापूरकडे विमानाने निघणार आहेत. साधारण तीन-साडेतीनच्या सुमारास ते कोल्हापूर विमानतळावर पोहोचतील. तेथून ते थेट नवीन राजवाडा येथे श्रीमंत शाहू छत्रपती महाराज यांची भेट घेण्यास जातील. यावेळी त्यांच्यासोबत खासदार संजय राऊत असतील. नवीन राजवाडा येथे निवडणुकीतील रणनीतीवर चर्चा होईल. येथील चर्चेनंतर मोटारीने ठाकरे थेट मिरजेला रवाना होतील.

महाविकास आघाडीचे कोल्हापूर लोकसभा मतदारसंघातील संभाव्य उमेदवार म्हणून शाहू महाराजांच्या नावावर जवळजवळ शिक्कामोर्तब झाले आहे. त्यांना कॉंग्रेसमधून उमेदवारी दिली जाणार असली तरीही ते महाविकास आघाडीचे उमेदवार असणार आहेत. त्यामुळे महाविकास आघाडीतील एक प्रमुख पक्ष असलेल्या ठाकरे गटाची कोल्हापूरची जागा केवळ शाहू महाराज असल्यामुळे कॉंग्रेसला दिली आहे.