पिंपरी : मावळ लोकसभा मतदारसंघात महायुतीतील शिवसेनेचे श्रीरंग बारणे यांनी संजोग वाघेरे यांचा पराभव करत आपली विजयाची हॅटट्रिक केली. पहिल्या फेरीपासूनच आघाडीवर राहिलेल्या बारणे यांचे मताधिक्य शेवटपर्यंत कायम राहिले व ९६ हजार मतांनी त्यांनी विजयश्री खेचून आणली.
दहाव्या फेरीनंतर बारणे यांनी ४० हजारांहून अधिक मतांनी आघाडी घेतली होती. त्यामुळे शिवसेनेच्या कार्यकर्त्यांनी मतमोजणी केंद्राबाहेर एकच जल्लोष केला. दुपारी दोनच्या सुमारास श्रीरंग बारणे मतमोजणीच्या ठिकाणी दाखल झाले. यावेळी भगवा रंग उधळून कार्यकर्त्यांनी त्यांचे स्वागत केले.
बालेवाडी येथील श्री शिवछत्रपती क्रीडा संकुल येथील वेटलिफ्टिंग हॉल येथे सकाळी आठ वाजता मावळ लोकसभा मतदार संघाच्या मतमोजणीला सुरुवात झाली. पहिल्या फेरीतच बारणे यांनी ५७३१ मतांची आघाडी घेतली. तर; दुसऱ्या फेरीत त्यांना तब्बल ८ हजार मतांची आघाडी मिळाली. भाजपचा बालेकिल्ला समजल्या जाणाऱ्या चिंचवड विधानसभा मतदारसंघात पहिल्यापासूनच बारणे यांना चांगले मताधिक्य मिळाले.
पिंपरी विधानसभा मतदारसंघातील स्थानिक उमेदवार असलेल्या वाघेरे यांना तेथील मतदारांचा पाठिंबा मिळाला नाही. सुरुवातीच्या दहा फेऱ्यांमध्ये बहुतांश वेळा पिंपरीमध्येही बारणेच आघाडीवर राहिले. २०१९ च्या लोकसभा निवडणुकीत बारणे यांना पनवेल विधानसभा मतदारसंघातही मोठे मताधिक्य मिळाले होते. मात्र, यावेळी वाघेरे यांनी या ठिकाणी त्यांना तगडी लढत दिली. उरण, कर्जत, मावळ या विधानसभा मतदारसंघांत कधी बारणे तर कधी वाघेरे पुढे राहिले. मात्र, इतर ठिकाणी मिळालेल्या मताधिक्याचा फायदा श्रीरंग बारणे यांना झाला व फेरीगणिक त्यांचे लीड वाढतच गेले.
मला दिलेल्या मतदानाबद्दल सर्व मतदारांचे आभार मानतो. उद्धव ठाकरे व महाविकास आघाडीच्या सर्व नेत्यांनी मला संधी दिली. त्याबद्दल मी त्यांचे आभार मानतो. या कौलाचा मी आदर करतो. पण; धनशक्तीचाही वापर झाला, हे ही नाकारता येणार नाही.
- संजोग वाघेरे, पराभूत उमेदवार, शिवसेना उद्धव बाळासाहेब ठाकरे, मावळ
विजयाचे श्रेय मतदार, कार्यकर्त्यांना
गेली दहा वर्षे मी जनतेशी एकरूप होऊन, काम करत होतो. जनतेच्या अनेक प्रश्नांना मी वाचा फोडली. त्यामुळे मावळचा मतदार व जनता ही माझ्या पाठीशी राहिली. या विजयाचे श्रेय मी माझ्या मतदारांना व कार्यकर्त्यांना देतो, अशा भावना शिवसेनेचे विजयी उमेदवार श्रीरंग बारणे यांनी व्यक्त केल्या. विजय स्पष्ट झाल्यावर बारणे हे मतमोजणी केंद्रावर दाखल झाले. त्यावेळी ते बोलत होते. ते म्हणाले, ‘‘विरोधी पक्षाच्या उमेदवाराकडे दाखविण्यासाठी कोणतेही काम नव्हते.’’
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
