Trinamool Congress : तृणमूल खासदारांची पोलिसांकडून उचलबांगडी

नवी दिल्ली : भाजप आणि तृणमूल काँग्रेसची पश्चिम बंगालमध्ये सुरू असलेली राजकीय लढाई आता दिल्लीत येऊन पोहोचली आहे. त्या पार्श्वभूमीवर तृणमूल काँग्रेसच्या खासदारांनी, सक्तवसुली संचालनालय (ईडी), केंद्रीय अन्वेषण विभाग (सीबीआय) आणि राष्ट्रीय तपास संस्‍थेच्या (एनआयए) प्रमुखांची तत्काळ बदली करावी या मागणीसाठी केंद्रीय निवडणूक आयोगाच्या मुख्यालयासमोर आज धरणे आंदोलन केले. अखेर, दिल्ली पोलिसांनी या खासदारांची उचलबांगडी करून त्यांना ताब्यात घेतले.

तृणमूल काँग्रेसचे खासदार डेरेक ओब्रायन, सागरिका घोष, दोला सेन, साकेत गोखले यांच्यासह अन्य नेत्यांच्या शिष्टमंडळाने निवडणूक आयोगाची भेट घेऊन सीबीआय, ईडी, एनआयए, प्राप्तिकर विभागाच्या प्रमुखांची तत्काळ बदली करावी अशी मागणी केली.

बाहेर आल्यानंतर या खासदारांनी निवडणूक आयोगाच्या मुख्यालयासमोर धरणे आंदोलनही सुरू केले. यावेळी पोलिसांनी तृणमूल काँग्रेस खासदारांना रोखण्याचा प्रयत्न केला. मात्र नंतर त्यांना पोलिसांनी अक्षरशः उचलून गाडीत टाकले.

आमचे आंदोलन शांततेच्या मार्गाने

तृणमूलच्या खासदार दोला सेन म्हणाल्या, आमचे आंदोलन शांततेच्या मार्गाने आहे पंतप्रधान व गृहमंत्र्यांच्या हातातील खेळणे असलेल्या तपास यंत्रणांच्या प्रमुखांना बदलण्यासाठी आम्ही निवडणूक आयुक्तांची भेट घेतली व आंदोलन सुरू केले.