Sangli Loksabha : 'सांगलीत मविआ जो उमेदवार देईल, त्याला शिवसेनेचा पाठिंबा असेल'; काय म्हणाले नितीन बानुगडे-पाटील?

सांगली : सांगलीतील जागेचा तिढा कायम असताना शिवसेनेने (Shiv Sena) प्रचाराला सुरवात करून काँग्रेसला आव्हान दिले होते. त्यानंतर जिल्ह्यातील काँग्रेस (Congress) नेते शिवसेनेविरोधात आक्रमक होऊन सांगलीची जागा सोडणार नसल्याचा इशारा दिल्यानंतर शिवसेनेचे संभाव्य उमेदवार चंद्रहार पाटील, संपर्कप्रमुख नितीन बानुगडे-पाटील (Nitin Banugade-Patil), जिल्हाप्रमुख संजय विभूते यांनी सूर बदलला. सांगली लोकसभेच्या जागेसाठी वरिष्ठ पातळीवर चर्चा सुरू आहे.

दोन दिवसांत उमेदवारी जाहीर केली जाईल. ‘‘मविआ’ जो उमेदवार देईल, त्याला पाठिंबा असेल,’ असे बानुगडे-पाटील यांनी पत्रकार परिषदेत स्पष्ट केले. दरम्यान, आज (ता. २१) सायंकाळी पाच वाजता मिरजेत माजी मुख्यमंत्री उद्धव ठाकरे यांचा ‘शिवसंवाद मेळावा’ होणार असल्याचेही त्यांनी सांगितले. ‘‘शिवसेना नेते संजय राऊत, सचिव मिलिंद नार्वेकर, वैभव नाईक आदी उपस्थित राहणार आहेत.

उद्धव ठाकरे यांनी सांगलीच्या जागेबाबत स्पष्ट संकेत दिले असल्यामुळेच तयारीला लागलो आहोत. लवकरच उमेदवारीची अधिकृत घोषणा होईल,’’ असेही त्यांनी सांगितले. बानुगडे-पाटील म्हणाले, ‘‘हुकूमशाही पद्धत राबवणाऱ्या भाजपला हद्दपार करण्यासाठी उद्धव ठाकरे यांचा झंझावाती दौरा राज्यभर सुरू आहे. आचारसंहितेपूर्वीच मिरजेतील सभा नियोजित होती. त्यामुळे ही सभा होत आहे. दुपारी तीन वाजता कोल्हापूर येथून ते सांगलीकडे रवाना होतील. सांगलीत वसंतदादांच्या स्मृतिस्थळाचे दर्शन घेतल्यानंतर मिरजेकडे रवाना होतील. मिरजेतील सभेस प्रतिसाद मिळेल. मेळावा सेनेचा असला तरी सभेसाठी मित्रपक्षांना निमंत्रण दिले आहे.’’

ते म्हणाले, ‘‘सांगलीच्या जागेबाबत स्पष्ट संकेत दिल्यामुळे त्यादृष्टीने कामाला लागलो आहोत. स्पष्टच संकेत असल्यामुळे अन्य विचार आवश्यक वाटत नाही. वरिष्ठ पातळीवर त्याबाबत चर्चा झाली आहे. सांगलीच्या जागेबाबत लवकरच अधिकृत घोषणा होईल. मिरजेतील सभेत ठाकरे यांच्याकडून सर्व प्रश्नांची उत्तरे मिळतील. तिकीट वाटपाचा अंतिम निर्णय वरिष्ठ पातळीवर होईल.’’ उपनेते अरुण दुधवडकर, प्रा. सिद्धार्थ जाधव, वैभव उगळे, संजय चौगुले, बजरंग पाटील, चंदन चव्हाण, शंभोराज काटकर, डॉ. किशोर ठाणेकर उपस्थित होते.

वसंतदादांचे नातू मदत करतील - चंद्रहार पाटील

चंद्रहार पाटील म्हणाले, ‘‘महाविकास आघाडीकडून जो निर्णय घेतला जाईल, त्याला बांधील राहणार आहे. तरीही जिल्ह्यात वसंतदादांनी हिंदकेसरी मारुती माने यांना राज्यसभेवर संधी दिली होती, त्याप्रमाणे त्यांचे नातू विशाल पाटील मला संसदेत पाठवतील, असा विश्वास आहे.’’