Kolhapur Lok Sabha : 'राज्यात महायुतीचे 45, तर देशात NDA चे 400 पेक्षा जास्त खासदार निवडून येतील' - शंभूराज देसाई

कोल्हापूर : ‘महायुतीचे (Mahayuti) जागा वाटप परस्परांच्या सहमतीने सुरू आहे. काही ठिकाणी पेच आहेत; पण महायुतीचे तिन्ही नेते त्यावर सामंजस्याने मार्ग काढत आहेत. महाविकास आघाडीमध्ये मात्र एकवाक्यता नसल्याचे दिसून येते. आघाडीतच परस्परांवर आरोप सुरू आहेत. परस्पर उमेदवार घोषित केले जात आहेत,’ अशी टीका उत्पादन शुल्क मंत्री शंभूराज देसाई (Shambhuraj Desai) यांनी केली.

ते महायुतीच्या मेळाव्यात बोलत होते. शंभूराज देसाई म्हणाले, ‘महायुतीचे जागा वाटप पूर्ण होत आले आहे. काही जागांबद्दल पेच असल्याने चर्चा सुरू आहे. महायुतीचे नेते त्यावर तोडगा काढतील. मात्र महाविकास आघाडीची अवस्था बिकट झाली आहे. त्यांच्या जागा वाटपाचा प्रश्न अजून सुटलेला नाही. कारण त्यांच्या नेत्यांत एकवाक्यता नाही. पंतप्रधान नरेंद्र मोदी (Narendra Modi) आणि राज्यातील महायुती यांच्या कामामुळे जनता प्रभावीत आहे. म्हणूनच राज्यात महायुतीचे ४५ पेक्षा जास्त खासदार निवडून येतील.

तर देशात एनडीए आघाडीचे ४०० पेक्षा जास्त खासदार निवडून येतील. राज ठाकरे यांनी महायुतीला पाठिंबा दिला ही स्वागतार्ह गोष्ट आहे. याचा लाभ महायुतीला होईल. हातकणंगले आणि कोल्हापूर या दोन्ही जागा महायुतीला मिळतील. कारण जिल्ह्यातील महायुतीचे नेते जोरदार प्रचार करत आहेत. मागील निवडणुकीपेक्षा जास्त मते घेऊन शिवसेनेचे उमेदवार निवडून येतील. सातारा येथील उमेदवारीचा प्रश्नही लवकरच संपेल.’ या मेळाव्याला पालकमंत्री हसन मुश्रीफ, राजेश क्षीरसागर, आमदार प्रकाश आबिटकर, माजी आमदार अमल महाडिक, के. पी. पाटील, समरजितसिंह घाटगे यांच्यासह महायुतीचे पदाधिकारी उपस्थित होते.

एकीकरण समितीचा निर्णय योग्यच

शंभूराज देसाई म्हणाले, ‘सीमाभागात महाराष्ट्र एकीकरण समितीने उमेदवार उभे केले आहेत. मराठी भाषिकांच्या पाठीशी शिवसेना नेहमीच ठामपणे उभी आहे. एकीकरण समितीने लोकसभेला उमेदवार उभे केले, हे योग्यच आहे.’

एकदिलाने प्रचार करू

‘नरेंद्र मोदी यांना तिसऱ्यांदा पंतप्रधान करण्यासाठी महायुतीतील सर्व घटक पक्ष अथक प्रयत्न करत आहेत. जिल्ह्यातील दोन्ही शिवसेनेच्या उमेदवारांना विजयी करण्यासाठी एकदिलाने काम करायला हवे. प्रचाराचे नियोजन करताना याची काळजी घेतली पाहिजे. मनामध्ये कोणतेही भेद न ठेवता संजय मंडलिक आणि धैर्यशील माने यांना मताधिक्य देऊया,’ असे आवाहन शंभूराज देसाई यांनी कार्यकर्त्यांना केले.