Kolhapur Lok Sabha : संभाजीराजेंवर कुणी दबाव टाकला, उमेदवारी मागं घेण्यास कुणी भाग पाडलं? सामंत आज करणार पर्दाफाश

कोल्हापूर : ‘छत्रपतींच्या गादीचा अपमान कुणी केला, संभाजीराजेंवर (Sambhaji Raje) कसा दबाव टाकण्यात आला. त्यांना उमेदवारी मागे घेण्यास कुणी भाग पाडले, या सर्वांचा एक मे रोजी कोल्हापुरात पर्दाफाश करणार असल्याचा इशारा उद्योगमंत्री उदय सामंत (Uday Samant) यांनी दिला. त्यांनी मुंबईत पत्रकारांशी संवाद साधला.

श्रीमंत शाहू छत्रपती महाराज (Shahu Chhatrapati Maharaj) यांच्याविरोधात महायुतीने उमेदवार देऊन छत्रपतींच्या गादीचा अपमान केला असल्याचा आरोप महाविकास आघाडीकडून प्रचारात सातत्याने केला जात आहे. त्या पार्श्वभूमीवर उद्योगमंत्री सामंत यांनी संबंधित बाबींचा कोल्हापुरात पर्दाफाश करण्याचा इशारा दिला आहे.

या निवडणुकीमध्ये अनेकांची विनोदबुद्धी फार जागृती झाली आहे. छत्रपती संभाजीराजे यांना तिकीट न देऊन कुणी खऱ्या अर्थाने गादीचा अपमान केला. त्यांच्याकडून कसे अॅग्रीमेंट करून घेण्यात आले. त्यांच्यावर कसा दबाव टाकण्यात आला.

उमेदवारी मागे घेताना संभाजीराजे यांनी घेतलेल्या पत्रकार परिषदेत वारंवार सांगत होते की, एका मंत्र्यांचा फोन आला होता. तो मंत्री मीच होतो. माझ्या बंगल्यावर त्यांच्याकडून कशा पद्धतीने अॅफिडेव्हिट लिहून घेण्यात आले. त्यांना कशी उमेदवारी मागे घ्यायला लावली या सर्व बाबींचा पर्दाफाश लाव रे तो व्हिडिओ अशा पद्धतीने करणार असल्याचे मंत्री सामंत यांनी सांगितले.