Raigad Lok Sabha : 'अंदरकी बात है, तीन एमएलए मेरे साथ है।' रायगडचे तीन आमदार वंचितच्या संपर्कात?

खेड : सुनील तटकरे (Sunil Tatkare) आणि अनंत गीतेंना (Anant Geete) मी बलाढ्य मानत नाही. अंदरकी बात है तीन एमएलए मेरे साथ है।, असे म्हणत वंचितच्या उमेदवार कुमुदिनी चव्हाण (Kumudini Chavan) यांनी खळबळ उडवली आहे. सोमवारी खेड तालुक्यातील भरणे या ठिकाणी चव्हाण यांनी पत्रकार परिषद घेऊन रायगड लोकसभा (Raigad Lok Sabha) मतदारसंघातील तीन विद्यमान आमदार आपल्यासोबत असल्याचा दावा त्यांनी केला.

दापोली विधानसभा मतदारसंघातील वंचितच्या शाखांमध्ये जाऊन प्रमुख कार्यकर्ते आणि पदाधिकाऱ्यांच्या सोबत चर्चा केली. लोकसभा निवडणुकीची रणधुमाळी आता रंगत आली असून, राज्यात अनेक मतदारसंघात महायुती आणि महाआघाडीसमोर वंचित बहुजन आघाडीने उमेदवार उभे करून आव्हान दिले आहे. रायगड लोकसभा मतदारसंघातील वंचितच्या उमेदवार कुमुदिनी चव्हाण यांनी दापोली मतदारसंघाचा दौरा केला.

यावेळी त्यांनी माध्यमांसोबत संवाद साधला. या दरम्यान त्या म्हणाल्या, वंचित पक्ष सोडला तर महायुती किंवा इंडिया आघाडीमधील कोणत्याच पक्षाला महिलांनी लोकसभेत नेतृत्व करावे, असे वाटत नाही. देशाचा विचार केल्यास फारच कमी पक्षांनी महिलांना उमेदवारी दिली आहे.

रायगड मतदारसंघात मी सुनील तटकरे आणि अनंत गीते यांना बलाढ्य प्रतिस्पर्धी मानत नाही. कारण, गीते हे दीर्घकाळ खासदार राहिले असले तरी ते आता निष्‍क्रीय असल्याचा ठपका त्यांच्यावर आहे तर तटकरे यांनी आपल्या मुलांना आमदार केले आहे. त्यांनी नक्की कोणाचा विकास केला, हे त्यावरून दिसते. खरे सांगायचे तर मला रायगडमधील बहुजन मराठा व अठरापगड जातीतील जनतेने उमेदवारी दिली आहे.