कोरोनानंतर महाराष्ट्रावर आता 'स्वाइन फ्लू'चं संकट; राज्यात 2,337 रुग्ण तर 98 जणांचा मृत्यू

Swine Flu In Maharashtra : गणेशोत्सवाला (Ganeshotsav) सुरुवात होत असतानाच स्वाइन फ्लूनं (Swine Flu) राज्याच्या चिंतेत भर पाडली आहे. यावर्षी 1 जानेवारी ते 28 ऑगस्ट या कालावधीत महाराष्ट्रात स्वाइन फ्लूचे 2,337 रुग्ण आढळले असून 98 जणांचा मृत्यू झालाय. यानंतर राज्याच्या आरोग्य विभागानं (Health Department) गणेशोत्सवात सहभागी होताना काळजी घेण्याचं आवाहन केलंय.

आरोग्य विभागानं सांगितलं की, ही प्रकरणं 19 जिल्ह्यांमध्ये नोंदवली गेली आहेत. त्यापैकी 770 प्रकरणं आणि 33 मृत्यू पुण्यात झाले आहेत. विभागाकडून मिळालेल्या माहितीनुसार, मुंबईत 348 रुग्ण आढळून आले असून तीन मृत्यू झाले आहेत, तर शेजारच्या ठाण्यात 474 रुग्ण आणि 14 मृत्यू झाले आहेत. या कालावधीत कोल्हापुरात 159 प्रकरणं आणि 13 मृत्यूची नोंद झालीय.

राज्यात 98 जणांचा मृत्यू

आकडेवारीनुसार, यावर्षी 1 जानेवारी ते 28 ऑगस्ट या कालावधीत राज्यात स्वाइन फ्लूचे 2 हजार 337 रुग्ण आढळून आले असून 98 जणांचा मृत्यू झालाय. स्वाइन फ्लूचे वाढते रुग्ण पाहता नागरिकांनी आगामी सण सावधगिरीने साजरे करावेत, असं आवाहन आरोग्य विभागानं केलंय. इन्फ्लूएंझा सारख्या आजारानं ग्रस्त असलेल्या लोकांनी सार्वजनिक ठिकाणी जाणं टाळावं आणि लोकांनी सार्वजनिक मेळाव्यात कोविड-19 नियमांचं पालन करावं, असं आवाहनही करण्यात आलंय.

पुण्यात सर्वाधिक 770 रुग्ण

1 जानेवारी ते 28 ऑगस्ट दरम्यान पुण्यात सर्वाधिक 770 रुग्ण आढळले आहेत. त्याखालोखाल ठाणे (474), मुंबई (348), नाशिक (195) आणि कोल्हापूर (159) आहे. राज्यातील 36 जिल्ह्यांपैकी 33 मृत्यूंसह पुण्याचा क्रमांक लागतो. त्यापाठोपाठ ठाणे (14), कोल्हापूर (13), नाशिक (12), सातारा (5), अहमदनगर (5) आणि मुंबई (3) यांचा क्रमांक लागतो.