Loksabha Election : लोकसभेच्या २५ जागा लढवणार - रामदास आठवले

मुंबई - आगामी २०२४ च्या लोकसभा निवडणुकीत राष्ट्रीय लोकशाही आघाडी (एनडीए) ला रिपब्लिकन पक्षाचा पाठींबा राहणार आहे. देशभरात रिपब्लिकन पक्षाचे २८ राज्ये आणि ८ केंद्रशासीत प्रदेशात संघटना वाढत आहे. ते बघता रिपब्लिकन पक्ष देशभरात लोकसभेच्या २५ जागा लढवेल. रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी ही घोषणा केली.

रिपब्लिकन पार्टी ऑफ इंडिया (आठवले) पक्षाच्या राष्ट्रीय कार्यकारणीची बैठक पार पडली. या बैठकीत २८ राज्य आणि ८ केंद्रशासीत प्रदेशातील कार्यकारणीच्या संघटनात्मक कामकाजाचा आढावा घेण्यात आला.

मार्च २०२४ पर्यंत सर्व राज्यांच्या कार्यकारणींचा अहवाल आणि किमान ५ लाख क्रियाशील सदस्य बनविण्याचे उद्दीष्ट पूर्ण करण्याचे निर्देश आठवले यांनी कार्यकर्त्यांना दिली. कार्यकर्त्यांनी स्थानिक प्रश्न, दलित, आदिवासी महिला यांच्या समस्या घेवून आपल्यापरीने आंदोलन करावे अशा सुचनाही आठवले यांनी दिल्या.