Koyna Dam : कोयना धरणातून 50 क्युसेस पाण्याचा विसर्ग बंद; जलाशयात फक्त 10.82 टीएमसी साठा शिल्लक

पाटण : मॉन्सूनच्या पावसाने (Monsoon Rain) दडी मारल्यामुळे कोयना धरणाच्या (Koyna Dam) पाणीसाठ्याने तळ गाठला आहे. जलाशयात फक्त १०.८२ टीएमसी पाणीसाठा शिल्लक असून, आजपासून पायथा वीजगृहातून होणारा एक हजार ५० क्युसेस पाण्याचा विसर्ग बंद करण्यात आला आहे.

पावसाचे आगमन झाले नाही तर कोयना आणि कृष्णा नदीच्या (Krishna River) काठावरील गावांना पाणीटंचाईचा सामना करावा लागणार आहे. आजपर्यंत कोयनानगर येथे ७७ मिलिमीटर, नवजाला ८८ मिलिमीटर व महाबळेश्‍वरला १०२ मिलिमीटर पावसाची नोंद झाली आहे.

धरणात १०.८२ टीएमसी पाणीसाठा शिल्लक असून, उपयुक्त पाणीसाठा फक्त ५.८८ टीएमसी आहे. पाऊस पडेल अशी परिस्थिती दिसून येत नाही. त्यामुळे कोयना धरण व्यवस्थापनाने आजपासून पूर्वेकडे सिंचनासाठी व पिण्याच्या पाण्यासाठी करण्यात येणारा व सुरू असलेला एक हजार ५० क्युसेस पाण्याचा विसर्ग बंद केलेला आहे.