Mumbai House : मुंबईत फक्त अडीच लाखांमध्ये घर! महापालिका निवडणुकांच्या अनुषंगाने राज्य सरकारचा मोठा निर्णय

मुंबईः मुंबईमध्ये हक्काच्या घराचं स्वप्न पूर्ण होणार आहे. गृहनिर्माण विभागाने एक शासन निर्णय जारी केला असून केवळ अडीच लाख रुपयांमध्ये घराची मालकी मिळणार आहे.

मुंबईमध्ये झोपडीच्या बदल्यात सशुल्क घर दिलं जाणार आहे. १ जानेवारी २००० ते २०११ या काळातील झोपडी धारकांना स्वस्तामध्ये घर मिळणार आहे. गृहनिर्माण मंत्री देवेंद्र फडणवीस यांनी मोठा निर्णय जाहीर केला.

यासंदर्भातला शासन निर्णय जारी झाला आहे. झोपडीच्या बदल्यात २ लाख ५० हजारांत मुंबईत घर मिळणार आहे. ऐन निवडणुकांच्या तोंडावर मोठा निर्णय राज्य सरकारने घेतला आहे. या निर्णयामुळे मुंबईतल्या घरांचं स्वप्न साकार होणार आहे. तेही फक्त अडीच लाख रुपयांमध्ये.

मुंबई महानगर पालिका डोळ्यासमोर ठेवून शिंदे-फडणवीस सरकारने हा निर्णय घेतल्याचं बोललं जात आहे. सर्वसामान्य मुंबईकरांना आणि झोपडपट्टीधारकांना यामुळे मोठा दिलासा मिळाला आहे. २०१८ मध्ये हा विषय चर्चेत आला होता. आज सरकारने यासंदर्भात निर्णय घेतला आहे.

या निर्णयांची अंमलबजावणी करण्यासाठी किती वेळ लागेल हे पाहाणं महत्त्वाचं आहे. हा निर्णय २०१४ ते २०१९मध्ये घेतलेलाच होता, असं माजी महापौर किशोरी पेडणेकर म्हटलं असून त्यांनी राज्य सरकारच्या या निर्णयाचं स्वागत केलं आहे.