Pune Accident : बावधानच्या पुलावरुन कंटेनर कोसळला; सुदैवाने पुलाखाली कोणीही नव्हतं...

पुणेः पुणे-बंगळूरु महामार्गावरुन प्रवास करणाऱ्या कंटेनरचा अपघात झाला आहे. चालकाचा ताबा सुटल्याने हा कंटेनर थेट पुलावरुन खाली कोसळला. सुदैवाने अपघातात कोणतीही जीवितहानी झाली नाही.

पुण्यातील बावधानच्या पुलावरून कंटेनर थेट खाली कोसळल्याची घटना घडली आहे. सुदैवाने यात कुठलीही जीवितहानी झाली नाही. या अपघातात मात्र कंटेनरचालक जखमी झाला आहे. पुणे-बंगळूरू महामार्गावरून हा कंटेनर प्रवास करत होता. अचानक कंटेनर चालकाचे नियंत्रण सुटले आणि तो पुलाच्या दुभाजकला जाऊन धडकला.

ही धडक इतकी जोरात होती की, कंटेनर दुभाजक तोडून थेट पुलाच्या खाली जाऊन पडला. पुलाखालून जाणाऱ्या रस्त्यावरून कोणीही नसल्यामुळे जीवितहानी झाली नाही. नेमका हा कंटेनर कुठे चालला होता, अपघात कसा झाला? याचा तपास पोलिस करत आहेत.

अपघात झाल्यानंतर अपघातस्थळी बघ्यांची गर्दी झाली होती. पुलावरुन प्रवास करणारे प्रवाशी थांबून कंटेनर बघत होते. त्यामुळे काहीकाळ वाहतुकीत अडथळा निर्माण झाला होता.