Aditya Thackeray : …इथे गद्दारीला स्थान नाही; बाजार समिती निवडणूक निकालांवरून आदित्य ठाकरे कडाडले!

राज्यातील कृषी उत्पन्न बाजार समितीचे निकाल जाहीर होताच या निकालावरून भविष्यातील राजकीय समिकरणांबद्दल अंदाज वर्तवले जात आहेत. राज्यातील 147 कृषी उत्पन्न बाजार समितीसाठी पार पडलेल्या निवडणूकांचे निकाल शनिवारी समोर आले आहेत. या निवडणूकांमध्ये महाविकास आघाडीविरुद्ध शिवसेना- भाजप युती (BJP) अशी थेट लढत या निवडणुकीत पाहायला मिळाली.

दरम्यान या निवडणूकीत धक्का बसलेल्यांमध्ये सत्ताधारी पक्षातील आमदार, खासदार आणि मंत्र्यांचा समावेश आहे.

दरम्यान राज्यभरातील या निकालावरून उद्धव ठाकरे गटाचे नेते आदित्य ठाकरे यांनी शिंदे गटाला टोला लगावला आहे. त्यांनी महाविकास आघाडीला या निवडणूकीत मोठं यश मिळाल्याचा दावा केला आहे. सोबतच इथे गद्दारीला स्थान नाही असेही म्हटले आहे.

आदित्य ठाकरेंनी बाजार समिती निवडणूक निकालाच्या पार्श्वभूमीवर ट्वीट केलं आहे. त्यांनी म्हटलं आहे की, कृषी उत्पन्न बाजार समिती निवडणुकीत महाविकास आघाडीला दणदणीत यश प्राप्त झाले आहे. महाराष्ट्राने पुनश्च दाखवले की इथे गद्दारीला स्थान नाही आणि हेच आपल्याला येत्या लोकसभा, विधानसभा, महानगरपालिका, नगरपालिका आणि जिल्हा परिषद निवडणुकीत दिसणार आहे.

तर शिवसेना-भाजपला शेतकऱ्यांनी नाकारल्याचे चित्र पाहिला मिळत आहे. या निवडणुकीत महाविकास आघाडीचा सर्वात जास्त बाजार समित्यांवर झेंडा फडकला आहे.

ठाकरे गटाचे खासदार संजय राऊत यांनी ट्विट करत या निकालावर प्रतिक्रिया दिली आहे, "बाजार समिती निवडणुकीत शिवसेनेसह महविकास आघाडीस उत्तम यश मिळाले. गद्दार आमदारांचा शेतकरी मतदारांनी करेक्ट कार्यक्रम केलं. हेच महाराष्ट्राचे जनमानस आहे. ही सुरुवात आहे.. महानगर पालिका, विधानसभा, लोकसभा निवडणुकीत असाच जोरदार कार्यक्रम होईल.लोकांनी खोके लाथाडले. हे स्पष्ट दिसते. हिम्मत असेल तर महानगर पालिका निवडणुका घेऊन दाखवा!"