ब्रेकिंग! अकरावीच्या विद्यार्थ्यांची प्रवेश प्रक्रिया लांबणीवर; ऑनलाइन संकेतस्थळात तांत्रिक अडचणी; आज मिळणार सुधारित वेळापत्रक

सोलापूर : इयत्ता अकरावीच्या प्रवेशासाठी अर्ज करताना विद्यार्थ्यांना कोणतीही अडचण येऊ नये म्हणून शिक्षण संचालनालयाने दोन दिवसांचा सराव ठेवला होता. त्यात अनेक विद्यार्थ्यांना तांत्रिक अडचणींचा सामना करावा लागला. २१ मे रोजी प्रवेश अर्ज भरताना देखील अशाच अडचणी आल्या. त्यामुळे आता त्या ऑनलाइन संकेतस्थळातील माहिती अधिक सुलभ, विद्यार्थ्यांच्या सोयीची केली जाणार आहे. त्यामुळे प्रवेशाचे वेळापत्रक दुरुस्त करावे लागणार असून ते उद्या (गुरुवारी) प्रसिद्ध केले जाणार आहे.

प्रवेशासाठी विद्यार्थ्यांना ऑनलाइन अर्ज करताना १० महाविद्यालयांचा पसंतीक्रम टाकावा लागणार आहे. दरम्यान, सध्याच्या वेळापत्रकानुसार १९ मे ते १३ जून असे पहिल्या फेरीचे वेळापत्रक जाहीर करण्यात आले होते. पण, २१ मे रोजी संकेतस्थळ व्यवस्थित चालू शकले नाही. त्यामुळे विद्यार्थ्यांना नोंदणी व प्राधान्यक्रम भरता आलेला नाही. त्यामुळे त्या तांत्रिक दुरुस्तीसाठी तुर्तास संकेतस्थळ बंद करण्यात आले आहे. अर्ज भरताना त्या संकेतस्थळात कोणतीही त्रुटी राहणार नाही, यादृष्टीने तो बदल केला जात आहे. या बाबीमुळे अर्ज भरण्यास काही दिवस विलंब होईल, पण तेवढा वेळ विद्यार्थ्यांना प्रवेशासाठी देण्याची हमी शिक्षण संचालनालयाने घेतली आहे.

विद्यार्थ्यांना ई-मेल, मोबाईलवर मेसेज

प्रवेशासाठी तयार केलेल्या संकेतस्थळात काही तांत्रिक त्रुटी राहिल्या आहेत. आता पोर्टल दुरूस्ती सुरू असल्याने विद्यार्थ्यांना ते कधी सुरू होणार आहे, याची माहिती त्यांच्या ई-मेल व मोबाईलवर मेसेजद्वारे दिली जाणार आहे. दुरूस्तीनंतर विद्यार्थ्यांना कमीत कमी वेळेत सुलभपणे अर्ज भरता येईल, अशी माहिती शिक्षण संचालक डॉ. महेश पालकर यांनी दिली.