Amruta Fadnavis: दाराला कुलूप, पोलिसांची नोटीस, जेलमधून सुटल्यावर अनिक्षा जयसिंघानी गेली कुठे?

अमृता फडणवीस यांच्या ब्लॅकमेलिंग प्रकरणातील महत्त्वाची आरोपी अनिक्षा जयसिंघानी नेमकी कुठे गेली आहे, यावरून आता चर्चा सुरु झाली आहे. अनिक्षा जयसिंघानी आणि तिचे वडील अनिल जयसिंघानी यांना सोमवारी कोर्टासमोर हजर करण्यात आलं होतं. अनिक्षा हिला जामीन मंजूर करण्यात आला तर अनिल जयसिंघानी याला न्यायालयीन कोठडी देण्यात आली होती.

त्यानंतर मंगळवारी अनिक्षा हिची भायखळा जेलमधून सुटका झाली. मात्र जेलमधून सुटल्यावर अनिक्षा जयसिंघानी उल्हासनगर येथील तिच्या घरी गेली नसल्याचं आढळून आलं आहे. उल्हासनगर येथील तिच्या घराला कुलूप असल्याचं दिसून आलं आहे.

उपमुख्यमंत्री देवेंद्र फडणीवस यांच्या पत्नी अमृता फडणवीस यांना १ कोटी रुपयांची लाच देणे आणि ब्लॅकमेलिंग करण्याचा प्रयत्न अनिक्षा जयसिंघानी आणि तिचे वडील अनिल जयसिंघानी यांनी केल्याचा आरोप आहे. १६ मार्च रोजी अनिक्षा जयसिंघानीला या प्रकरणात क्राइम ब्रांच पोलिसांनी अटक केली होती. त्यानंतर अनिल जयसिंघानी याला गुजरातमधून अटक करण्यात आली होती.

या गुन्ह्यामध्ये अनिल जयसिंघानी प्रमुख आरोपी असल्याचा युक्तिवाद कोर्टासमोर करण्यात आला. माध्यमांपासून लपण्यासाठी अनिक्षाने घरी येणं टाळलं असल्याचा संशय व्यक्त केला जात आहे.

अनिल जयसिंघानी याचा जामीन अर्ज मंगळवारी फेटाळण्यात आला आहे. मंगळवारी अनिक्षा जयसिंघानी हिची भायखळा जेलमधून सुटका करण्यात आली. त्यानंतर अनिक्षा डीबी मार्ग पोलीस ठाण्यातून रवाना झाली. मात्र तिला ज्या घरातून अटक करण्यात आली होती, त्या उल्हासनगरच्या घरी ती आलेलीच नाही. या घराला कुलूप लागलेलं असून दारावर अनिल जयसिंघानीच्या नावाने पोलिसांची नोटीस लावलेली आहे. अनिक्षा माध्यमांचा ससेमिरा चुकवण्यासाठी अज्ञातस्थळी रवाना झाल्याची शक्यता आहे.