Ahmednagar Violence: मिरवणुकीवर दगडफेकीनंतर शेवगावमध्ये दोन गटात राडा; ४ जण जखमी

अकोल्यानंतर शेवगावमध्येही जोरदार राडा झाला. अहमदनगरमधील शेवगावमध्ये काल दोन गटांमध्ये दगडफेक झाली. छत्रपती संभाजी महाराज्यांच्या जयंतीनिमित्त शेवगाव शहरात मिरवणूक काढण्यात आली होती. या मिरवणुकीदरम्यान दगडफेक झाली. यामध्ये चार पोलीस जखमी झाले आहेत. तर अनेक वाहनांचं मोठं नुकसान झालं आहे.

छत्रपती संभाजी महाराज्यांच्या जयंतीनिमित्त शेवगाव शहरामध्ये मिरवणूक काढण्यात आली होती. ही मिरवणूक रात्री आठच्या सुमारास छत्रपती शिवाजी महाराज चौकात पोहोचली. यावेळी अचानक मिरवणुकीच्या दिशेनं एका गटाकडून दगडफेक केल्याची माहिती आहे.

तर दुसऱ्या गटाकडून सांगण्यात आलं आहे की, धार्मिक स्थळावर अगोदर दगडफेक करण्यात आली. त्याचं प्रत्युत्तर म्हणून मिरवणुकीवर दगडफेक केली गेली. यामुळे अफवांमुळे दोन्ही बाजूकडून दगडफेक झाली. त्यामुळे पळापळ झाली. गोंधळामुळे व्यावसायिकांनी दुकाने बंद केली. जमावानं यावेळी वाहनांवरही दगडफेक केली यामध्ये वाहनांची मोठ्या प्रमाणावर तोडफोड केली. काही दुकानांवरही हल्ला चढवत तोडफोड केली. दरम्यान पोलिसांनी परिस्थिती नियंत्रणात आणली आहे.

शेवगावमधील दगडफेकीत चार जण जखमी झाल्याची माहिती आहे. याप्रकरणी पोलिसांनी 102 लोकांवर गुन्हा दाखल केला आहे. तर 50 अज्ञात व्यक्तींविरोधात रात्री उशिरा गुन्हा दाखल झाला आहे. राज्य राखीव पोलीस दलाच्या 2 तुकड्या सध्या शेवगावमध्ये तैनात करण्यात आल्या आहेत. हा वाद नेमका का सुरू झाला? याचं कारण पोलीस तापासानंतरच समजेल. सध्या शेवगावमध्ये तणावपूर्ण शांतता आहे.