मी पण कामं करतो, पण फोन चालू असताना कधी कॅमेरा लावला नाही - अजित पवार

मुंबई : सोशल मीडियावर सध्या मुख्यमंत्री एकनाथ शिंदे (CM Eknath Shinde) यांचे फोनवरून आदेश देताना अनेक व्हिडीओ व्हायरल होत आहेत. त्यावरून त्यांना अनेकजण सोशल मीडियावरून ट्रोल करताना दिसत आहेत. दरम्यान, मी पण काम करत होतो पण फोन चालू असताना कधी कॅमेरा लावायला सांगितला नाही असं राष्ट्रवादीचे नेते आणि विरोधीपक्षनेते अजित पवार (Ajit Pawar) म्हणाले आहेत.

(Ajit Pawar On CM Eknath Shinde)

दरम्यान, एकनाथ शिंदे यांचे काही व्हिडीओ सोशल मीडियावर व्हायरल होत आहेत. एका व्हिडीओमध्ये ते पंढरपूरच्या वारीतील आजारी वारकऱ्याची चौकशी करताना दिसत आहेत. त्यांच्यावर चांगला उपचार करा, आणि शक्य नसेल तर खासगी मोठ्या रूग्णालयात हलवा मी त्यांचा सगळा खर्च करतो असं ते म्हणताना दिसतात. तर दुसऱ्या एका व्हिडीओमध्ये ते एका अधिकाऱ्याला फोन लावून पूराची माहिती घेत आहेत. तर सदर अधिकाऱ्याला उपाययोजना करण्यासंदर्भात आदेश देताना दिसत आहेत. यानंतर त्यांचे हे व्हिडीओ सोशल मीडियावर प्रचंड व्हायरल होत आहेत.

यानंतर विरोधीपक्षनेते अजित पवार यांनी मुख्यमंत्र्यावर टीका केली आहे. ते म्हणाले की, मी पण अधिकाऱ्यांना फोन लावायचो आणि आदेश द्यायचो पण कधी फोन चालू असताना कॅमेरा चालू करायला लावला नाही अशी टीका पवार यांनी केली आहे. कुठलंही काम माझ्याकडे आलं तर मी लगेच फोन करायला लावतो पण लगेच कॅमेरा पण लाव असं कधी म्हणत नाही असं अजित पवार म्हणाले आहेत.