अनिल देशमुखांना दिलासा नाही; जेजे रुग्णालयात उपचार घ्या

मनी लाँड्रिंग प्रकरणात सध्या तुरुंगात असलेले राज्याचे माजी गृहमंत्री अनिल देशमुख यांना न्यायालयाकडून शस्त्रक्रियेसाठी कोणताही दिलासा मिळालेला नाही. काही दिवसांपूर्वी देशमुख यांनी शस्त्रक्रिया खासगी रुग्णालयात करण्यासाठी न्यायालयाकडे परवानगी मागितली होती. खांद्यावरील शस्त्रक्रियेसाठी जेजे रुग्णालयातच उपचार घेण्याचे निर्देश न्यायालयाने दिले आहेत. उपचारा करताना घरातील एक व्यक्ती देशमुख यांच्यासोबत उपस्थित असणार आहे, न्यायालयाने तसे स्पष्ट केलं आहे. (Anil Deshmukh Latest Marathi News)

मनी लॉन्ड्रिंगप्रकरणी अटकेत असलेले माजी गृहमंत्री अनिल देशमुख यांच्या वैद्यकीय अर्जावर आज न्यायालयानं निर्णय सुनावला आहे. देशमुख यांना खांदेदुखीचा त्रास आहे. त्यामुळे खांद्यावर खासगी रुग्णालयात शस्त्रक्रिया करण्याची परवानगी द्या अशी मागणी देशमुख यांनी मुंबई सत्र न्यायालयाकडे केली होती.

जे.जे. रुग्णालयात अद्ययावत सोयी सुविधांचा अभाव आहे. त्यामुळे वाढते वय पाहता सरकारी रुग्णालयाऐवजी खाजगी रुग्णालयात उपचार करण्याची परवानगी देण्यात यावी अशी मागणी देशमुखांनी न्यायालयाकडे केली होती. मात्र ईडीनं याला विरोध केला होता. ईडीनं देशमुखांवर तातडीनं शस्त्रक्रिया करण्याची गरज नसल्याचं सांगणारा अहवाल कोर्टात सादर केला होता. तसेच खासगी ऐवजी जेजेतही ही शस्त्रक्रिया होऊ शकते, असाही ईडीनं दावा केला होता.

दरम्यान, कोट्यवधी रुपयांची अवैध वसुलीचा आरोप झाल्यानंतर, अनिल देशमुख यांना ईडीने २ नोव्हेंबर २०२१ रोजी अटक केली होती. अनिल देशमुख सध्या मुंबईतील आर्थर रोड तुरुंगात न्यायालयीन कोठडीत आहेत. मुंबईचे तत्कालीन पोलिस आयुक्त परमबीर सिंह यांनी त्यांच्यावर वसुलीचा आरोप केला होता. अनिल देशमुख यांनी सर्व आरोप फेटाळले होते. मात्र, या आरोपांनंतर अनिल देशमुख यांना मंत्रिपदाचा राजीनामा द्यावा लागला होता.