Ashadhi Ekadashi : मुख्यमंत्र्यांकडून सपत्नीक विठ्ठलाची महापूजा; यंदा अहमदनगरच्या शेतकरी कुटुंबाला मिळाला पूजेचा मान

पंढरपूर : एकीकडं हरिनाम आणि विठ्ठल भक्तीनं पंढरी सजली आहे. सर्व संतांच्या पालख्या पंढरीत विसावल्या आहेत. टाळ-मृदंग, भजन, कीर्तन आणि भाविकांची गर्दी दिसून येत आहे.

आज आषाढी एकादशीनिमित्त मुख्यमंत्री एकनाथ शिंदे (Eknath Shinde) यांनी सपत्नीक विठ्ठल-रुक्मिणी मंदिरात महापूजा केली. मुख्यमंत्री म्हणून एकनाथ शिंदे यांना दुसऱ्यांदा पूजेचा हा मान मिळाला आहे.

तसेच अहमदनगर जिल्ह्यातील काळे दाम्पत्याला यंदा पूजेचा मान मिळाला आहे. भाऊसाहेब आणि मंगल काळे (रा. वाकडी, नेवासा) हे गेल्या २५ वर्षांपासून पंढरीची पायी वारी करत आहेत. भाऊसाहेब व्यवसायानं शेती करतात.