"येत्या काळात महाविकास आघाडी सरकारला सळो की पळो करुन सोडणार"

आगामी काळात होणाऱ्या विधानपरिषद निवडणुका तसेच, मुंबई मनपा निवडणुकीच्या अनुषंघाने भाजपने जोरदार तयारी सुरू केल्याचं पाहायला मिळतं आहे. त्याचसाठी भारतीय जनता पक्षाच्या कोअर कमीटीची बैठक आज मुंबईत पार पडली. यानंतर भाजप आमदरा आशिष शेलार यांनी महाविकास आघाडी सरकारला येत्या काळात आम्ही सळो की पळो करून सोडणार असल्याचं सांगितलं.

आशिष शेलार यांनी याबद्दल बोलताना महाविकास आघाडी सरकारसमोर भाजप एक मोठं आवाहन निर्माण करणार असल्याचे सांगितले. आगामी काळातील १५ विधानपरिषदेच्या निवडणुकांमध्ये सुद्धा आमच्या ताकदीच्या आधारावर यश मिळवण्यासाठी योजना आम्ही बनवलेली आहे. तसेच राज्याचं महाविकास आघाडीच्या कुकृत्याचं, गैरकारभाराचं आणि भ्रष्टाचाराचं या विषयातला सुद्धा आम्ही नियोजनबद्धरित्या जनतेसमोर जाणार आहोत अशी माहिती आशिष शेलार यांनी दिली.

मोदी आणि केंद्रातलं सरकार याबद्दल बदनामीचा सुनियोजित कट तीन्ही पक्ष कधी बरोबर कधी विरोधात जाऊन करत आहेत. असत्याच्या पेरणीच्या आधारावर यशाच्या विजयाची गुढी उभारण्याचा त्यांचा प्रयत्न आहे. तो सफल होऊच शकत नाही. महाराष्ट्रातली जनता त्याला थारा देऊच शकत नाही. त्यामुळे या बदनामीला सुरुवात करणाऱ्या या नेत्यांविरोधात या पक्षांच्या विरोधात भांडाभोड सुनियोजित पद्धतीनं करण्याचा आम्ही कार्यक्रम आयोजित करणार असंही आशिष शेलार यांनी सांगितलं.