"....हे संजय राऊत यांचं कोणतं कर्तुत्व आणि कर्तव्य आहे?", आशिष शेलार यांची टिका

शिवसेना खासदार संजय राऊत यांनी भाजपला चिमटा काढत एक जुने व्यंगचित्र सोशल मीडियावर शेअर केले होते. या व्यंगचित्रावरून आत भाजप आणि शिवसेनेमध्ये पुन्हा एकदा वाद चिघळण्याची शक्यता आहे. यावर भाजप नेते आशिष शेलार यांनी प्रसार माध्यमांशी बोलताना प्रतिक्रिया दिली. बाळासाहेब ठाकरे आणि प्रमोद महाजन यांचं कार्टून जुनं आहे. ते जुनं कार्टून शेअर करण्यात संजय राऊत यांचं कोणतं कर्तुत्व आणि कर्तव्य आहे? असा खोचक सवाल आशिष शेलार यांनी उपस्थित केला.

"बाळासाहेब ठाकरे आणि प्रमोद महाजन यांचं एक जुने कार्टून संजय राऊत यांनी आज शेयर केले. कार्टून हे अभिव्यक्ती स्वातंत्र्याचा भाग आहे. याला विरोध नाही. मात्र, कार्टूनवरून टीका करायची आणि राग आला तर पळून जायचं. हे संजय राऊत यांचं कोणतं कर्तुत्व आणि कर्तव्य आहे? तुमच्यावरील कार्टून कुणी व्हॉट्सअपवर पाठवलं तर नौदलाच्या अधिकाऱ्याचे तुम्ही डोळे फोडणार आणि दुसऱ्याबाबत मात्र तुम्ही कार्टून पोस्ट करणार. अशी दुटप्पी भूमिका संजय राऊत तुम्ही घेऊ नका. प्रमोद महाजनांच्या पायाजवळ पोहचण्याची सुद्धा तुमची अजूनही योग्यता आलीय का हा आमचा प्रश्न आहे",अशी टीका शेलारांनी केली.