उच्च न्यायालयाच्या कोल्हापूर सर्किट बेंचचा मोठा निर्णय! तडजोडीने रद्द केला संशयित तरूणावरील दुष्कर्माचा खटला

तात्या लांडगे

सोलापूर : येथील युवतीवर दुष्कर्म केल्याप्रकरणी अमोल ज्ञानदेव जाधव (रा. औरंगपूर, जि. बीड) याच्यावर दाखल फिर्याद उच्च न्यायालयाच्या कोल्हापूर सर्किट बेंचचे न्यायमूर्ती एम. एस. कर्णिक व शर्मिला देशमुख यांनी रद्दबादल केली आहे.

पीडिता व संशयित आरोपी अमोल हे नातेवाईक होते व त्यांचे लग्न जमले होते. परंतु, काही दिवसांनी त्यांचे लग्न मोडले. त्यानंतर दोघे फोनवर बोलत होते. अमोल हा ‘मी तुझ्याशीच लग्न करणार’ असे म्हणत होता. १० नोव्हेंबर २०२४ रोजी अमोल सोलापूरला आला. त्याने पिडीतेस बोलावून घेऊन हॉटेलमध्ये नेऊन दुष्कर्म केले. त्यानंतर अमोलने पीडितेस फोन करून वाढदिवसासाठी बीड येथे बोलावले. १६ नोव्हेंबर २०२४ रोजी पीडिता बीडला गेली. अमोलने लग्नाचे अमिष दाखवून पुन्हा दुष्कर्म केले.

पीडिता अमोलला लग्नाबाबत विचारत होती, त्यावेळी ‘थोडे थांब’ असे म्हणत होता. त्यानंतर २१ डिसेंबर २०२४ रोजी अमोलने तिच्या घरी येऊन शिवीगाळ करून पीडितेच्या वडिलास जीवे मारण्याची धमकी दिली, अशी फिर्याद पिडीतेने सलगर वस्ती पोलिसांत दिली. गुन्हा दाखल झाल्यावर अमोल जाधव याने ॲड. थोबडे यांच्यामार्फत कोल्हापूर उच्च न्यायालयात दाखल फिर्याद रद्द होण्याबाबत याचिका दाखल केली होती.

सर्वोच्च न्यायालयाचे सादर केले निवाडे

सुनावणीवेळी ‘पिडीतेस खटला पुढे चालवायचा नाही, तिने दाखल केलेली फिर्याद रद्द करण्यास पीडितेची हरकत नाही’, या बाबी ॲड. थोबडे यांनी न्यायालयाच्या निदर्शनास आणून दिल्या. त्या पृष्ठार्थ ॲड. थोबडे यांनी सर्वोच्च न्यायालयाचे निवाडे सादर केले. त्यावरून न्यायमूर्तींनी आरोपीविरुद्ध दाखल फिर्याद रद्दबातल केली. यात संशयितातर्फे ॲड. रितेश थोबडे यांनी काम पाहिले.