सोलापूर : प्रसिद्ध न्यूरोफिजिशियन डॉ. शिरीष वळसंगकर यांच्या खिशात सापडलेली सुसाईड नोट ही पोलिसांच्या दृष्टीने मनीषा मुसळे मानेविरूद्धचा महत्त्वाचा पुरावा आहे. परंतु, डॉक्टरांच्या आत्महत्येसाठी मनीषाच कारणीभूत आहे, हे सिद्ध करण्यासाठी पोलिसांना अन्य पुरावे गोळा करावे करावे लागतील. इतर पुरावे न मिळाल्यास भारतीय न्याय संहितेतील कलम १८९ नुसार न्यायालय संशयिताला निर्दोषसुद्धा सोडू शकते. त्यासंदर्भात उच्च आणि सर्वोच्च न्यायालयाचे निकाल असल्याचे तज्ज्ञ वकिलांनी ‘सकाळ’शी बोलताना सांगितले. त्यामुळे पोलिसांनी वळसंगकर रुग्णालयातूनच मनीषाविरूद्ध काही पुरावे हाती लागतात का, हे शोधण्यावर भर दिल्याचे दिसत आहे. त्या अनुषंगाने तपास अधिकाऱ्यांनी मंगळवारी (ता. २९) रुग्णालयात, डॉक्टरांच्या घरी जाऊन चौकशी केली.
स्वत:वर गोळ्या झाडलेल्या डॉ. शिरीष यांना त्यांच्याच रुग्णालयात उपचारासाठी दाखल केल्यावर उपचारावेळी त्यांच्या अंगावरील कपडे फाडून काढले फाडण्यात आले होते. त्यांचा मृत्यू झाल्यावर पोलिसांनी डॉक्टरांचे कपडे ताब्यात घेतले होते. दुसऱ्या दिवशी पडताळणीवेळी पॅन्टमध्ये सुसाईड नोट मिळाल्याची नवी माहिती पोलिसांनी दिली. पण, डॉ. अश्विन यांच्या फिर्यादीनुसार आत्महत्येच्या दिवशी डॉ. शिरीष वळसंगकर, त्यांची पत्नी डॉ. उमा व मुलगा डॉ. अश्विन यांच्यासमोर मनीषानी ‘ई-मेल’बद्दल माफी मागितली आणि माफीनामा लिहून दिला.
ई-मेलची मूळ प्रत देखील रुग्णालयात फाडून टाकल्याचे म्हटले आहे. त्यामुळे ई-मेलमुळे डॉ. शिरीष आत्महत्या कसे करतील, हा प्रश्न सर्वांनाच पडला आहे. त्याचे उत्तर शोधण्यासाठी पोलिसांनी सुरवातीला मनीषाची तीन दिवसांची पोलिस कोठडी घेतली. त्यानंतर दोन दिवसांची वाढीव कोठडीही घेतली. मात्र, त्यांच्याकडे तपास करून काही निष्पन्न होणार नाही म्हणून पोलिसांनी १४ दिवसांची न्यायालयीन कोठडी मागितली. ९ मे ला कोठडीची मुदत संपणार आहे. तत्पूर्वी, पोलिसांना ठोस पुरावे न मिळाल्यास मनीषाला जामीन मिळू शकतो, असे तज्ज्ञ वकील सांगत आहेत.
मनीषाच्या जामिनावर न्यायालयाने मागविले सरकारी पक्षाचे म्हणणे
डॉ. शिरीष वळसंगकर यांच्या आत्महत्येप्रकरणात अटकेत असलेल्या मनीषा मुसळे माने या सध्या न्यायालयीन कोठडीत आहेत. पोलिसांनी मागितलेली न्यायालयीन कोठडी ९ मे रोजी संपणार आहे. दरम्यान, मनीषाचे वकील प्रशांत नवगिरे यांनी त्यांच्या जामिनासाठी न्यायालयात अर्ज केला असून न्यायालयाने त्यावर ९ मे पर्यंत म्हणणे सादर करायला सांगितले आहे. पोलिसांनी मनीषाच्या पोलिस कोठडीचे हक्क राखून १४ दिवसांची न्यायालयीन कोठडी मागितली होती. त्यातील पाच दिवस संपले असून अजूनपर्यंत पोलिसांनी मनीषाच्या कोठडीची मागणी केलेली नाही.
डॉक्टरांच्या दुसऱ्या मोबाईलचाही ‘सीडीआर’
डॉ. शिरीष वळसंगकर हे दोन मोबाईल (एक वैयक्तिक तर दुसरा रुग्णालय कामकाजासाठी) वापरत होते. त्यांच्या आत्महत्येनंतर पोलिसांनी दोन्ही मोबाईल जप्त केले. पोलिसांनी आता रुग्णालयाच्या कामकाजासाठी वापरणाऱ्या दुसऱ्या मोबाईलचेही कॉल डिटेल्स (सीडीआर) घेतले आहेत. अद्याप रेकॉर्डिंग उपलब्ध नाहीत. त्यामुळे डॉक्टरांना आत्महत्येच्या दिवशी व त्याआधी ४-५ दिवसांत कॉल करणाऱ्यांकडे पोलिस विचारपूस करतील. याशिवाय, त्या काही दिवसातील कॉल्सचे रेकॉर्डिंग संबंधित कंपन्यांकडे पोलिसांनी मागविल्याचेही वरिष्ठ सूत्रांनी सांगितले. त्यातून काहीतरी ठोस पुरावे हाती लागतील, असा पोलिसांना विश्वास आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.