Tata Airbus Project: 'एअरबस' प्रकल्प नाशिकला नेण्यासाठी छगन भूजबळांनी दिलं होतं पत्र

मुंबईः वेदांता-फॉक्सकॉन प्रकल्पानंतर आता एअरबस टाटा हा प्रकल्प गुजरात राज्यामध्ये गेला आहे. त्यामुळे राज्यातील राजकीय वातावरण पुन्हा तापू लागलं आहे. राष्ट्रवादी काँग्रेसचे नेते छगन भूजबळ यांनी यासंदर्भात एक पत्र पाठवल्याचं सांगितलं आहे.

टाटाचा एअरबस हा प्रकल्प गुजरातला गेल्याने सर्व पक्षांकडून टोलवाटोलवी सुरु आहे. आ. छगन भूजबळ यांनी आज माध्यमांशी संवाद साधला. ते म्हणाले की, एअरबस प्रोजेक्टचं काम टाटा ग्रुपला मिळाल्यानंतर मी तेव्हा त्यांना पत्र पाठवलं होतं. हा प्रकल्प नाशिकमध्ये व्हावा, अशी मागणी केल्याचं भूजबळांनी सांगितलं.

''एकापाठोपाठ एकेक प्रकल्प गुजरातला जात आहे. ही गंभीर बाब आहे. देवेंद्र फडणवीस यांचं दिल्लीत वजन आहे. त्यांनी असे प्रकल्प महाराष्ट्रात राहण्यासाठी प्रयत्न केले पाहिजेत. आपल्या युवकांनी फक्त दहिहंडी, आरत्या, हनुमान चालिसा, फटाके.. यातच गुंतून रहायचं का? निदान यापुढे तरी फडणवीसांनी प्रयत्न करायला हवेत.'' अशा शब्दांत भूजबळांनी भूमिका स्पष्ट केली.

दरम्यान, भाजपने ट्विट करत उद्धव ठाकरेंनी महाराष्ट्राच्या जनतेची माफी मागावी, अशी मागणी केली आहे. उद्धव ठाकरेंनी अडीच वर्षे स्वतःला घरात कोंडून घेतल्यानेच 'एअरबस टाटा' गुजरातमध्ये गेला. असा आरोप भाजपने केला आहे. तसेच, भाजपने ट्विटची मालिका शेअर करत या प्रोजेक्टबद्दल खुलासा केला आहे.