Maharashtra Weather: राज्यात थंडीचा कडाका वाढणार, अनेक जिल्ह्यातील तापमानात झाली घट

राज्यात गारठा वाढणार असल्याचा अंदाज हवामान विभागाने वर्तविला आहे. अरबी समुद्रात तयार झालेल्या कमी दाबाच्या क्षेत्रामुळे राज्यात ढगाळ वातावरण निर्माण झाले होते तर अनेक भागात पावसाने हजेरी लावली होती. मात्र, आता राज्यातील ढगाळ वातावरण कमी झालं असून थंडी जाणवू लागली आहे. त्यामुळे नोव्हेंबर महिन्याच्या अखेरीस राज्यात कडाक्याची थंडी पडेल, असा अंदाज वर्तवण्यात आला आहे.

जम्मू काश्मीरमध्ये सुरू झालेल्या बर्फवृष्टीमुळे महाराष्ट्रात देखील उत्तरेकडून येणारे थंड वारे सक्रिय झाले आहेत. त्यामुळे राज्यातील ढगाळ वातावरण कमी झालं असून लवकरच थंडी पडेल, असा अंदाज वर्तवण्यात आला आहे. या वाढत्या थंडीचा चांगला परिणाम रब्बी हंगामाच्या पिकांवर होणार आहे. गहू, हरबरा पिकांना मोठा दिलासा मिळणार आहे. चालू असलेल्या नोव्हेंबर महिन्याच्या अखेरीस राज्यात थंडीचा जोर अधिक वाढण्याची शक्यता व्यक्त केली जात आहे.

पुणे आणि शहर परिसरात मंगळवारी (ता. १४) आणि बुधवारी (ता. १५) कोरड्या हवामानासह पहाटे धुक्याची शक्यता वर्तविण्यात आली आहे.

दरम्यान, तापमानात होणारी घट आणि फटाक्यांची आतषबाजी यामुळे सध्या प्रदूषणाचे प्रमाण वाढले आहे. परिणामी पहाटेच्या वेळी चक्क धुरके पसरत आहे. पुढील आठवडाभर मुख्यतः निरभ्र वातावरण कायम राहणार असून, किमान तापमानाचा पाराही साधारणपणे १७ अंशांच्या जवळपास कायम राहू शकतो, असा अंदाज हवामानशास्त्र विभागाने दिला.

पुणे शहरात सोमवारी (ता. १३) १७.३ अंश सेल्सिअस इतक्या किमान आणि ३१.६ अंश सेल्सिअस कमाल तापमानाची नोंद झाली. दरम्यान, सरासरीपेक्षा अद्याप किमान तापमानात वाढ कायम आहे. राज्यातील गारठा वाढण्याची शक्यता असून उत्तर महाराष्ट्रात किमान तापमानात घट होण्याची चिन्हे आहेत.

सोमवारी (ता. १३) राज्यातील नीचांकी तापमानाची नोंद औरंगाबाद येथे १४.८ अंश सेल्सिअस इतकी झाली. तर, कोकणात मात्र कमाल तापमानात सरासरीपेक्षा वाढ कायम आहे. विदर्भात किमान तापमानात सरासरीपेक्षा काहीशी घट झाली असून उत्तर महाराष्ट्रातील किमान तापमानातही घट होऊ लागली आहे.