'इंदापूरबाबत शरद पवारांशी सकारात्मक चर्चा; आता हर्षवर्धन पाटलांनी ठरवावे'

मुंबई : इंदापूरची जागा राष्ट्रवादी काँग्रेसकडे असल्याने नाराज असलेल्या हर्षवर्धन पाटील यांनी बुधवारी मेळावा घेत भाजपमध्ये जाण्याचे संकेत दिल्याने काँग्रेस हायकमांड धास्तावले आहे. इंदापूरच्या जागेबाबत राष्ट्रवादी काँग्रेसचे अध्यक्ष शरद पवार यांच्या सकारात्मक चर्चा झाल्याचे काँग्रेसचे माजी प्रदेशाध्यक्ष अशोक चव्हाण यांनी म्हटले आहे.

अशोक चव्हाण यांनी म्हटले आहे, की इंदापूर जागेसंदर्भात शरद पवार यांच्याशी सकारात्मक चर्चा झाली. परंतू, हर्षवर्धन पाटील ‘नॉट रिचेबल’ असल्यामुळे संपर्क होऊ शकत नाही. परंतु आता काय करायचं ते हर्षवर्धन पाटील यांनी ठरवायचे आहे. मी सकाळपासून हर्षवर्धन यांना फोन करतोय पण मोबाईल बंद येतोय. म्हणून मीडियाच्या माध्यमातून हर्षवर्धन यांना आवाहन करतोय.

इंदापूर विधानसभेच्या जागेबाबत राष्ट्रवादी काँग्रेसची दगाबाजी व काँग्रेस नेत्यांच्या हतबलतेमुळे व्यथित झालेले माजी सहकारमंत्री हर्षवर्धन पाटील यांनी अखेर विराट सभेस कौल मागितला आणि सभेने त्यांना भाजपमध्ये जाण्याचा कौल दिला. त्यांनीही हा कौल मान्य करून भाजपमध्ये जाण्याचे संकेत दिले. तसेच, येत्या मंगळवारी (ता. 10) निर्णय घेण्याची घोषणा केली.