Bharat Jodo Yatra: 'त्या' पैशांतून होतोय भारत जोडो यात्रेचा खर्च; भाजपचे गंभीर आरोप

नागपूरः राहुल गांधी यांची भारत जोडो यात्रा काल महाराष्ट्रात दाखल झाली. १२ ते १३ दिवस ही यात्रा महाराष्ट्रात असणार आहे. मात्र भाजपकडून या यात्रेच्या खर्चावरुन गंभीर आरोप करण्यात आलेत.

Chandrashekhar Bawankule on Bharat Jodo Yatra

भाजप प्रदेशाध्यक्ष चंद्रशेखर बावनकुळे म्हणाले की, राहुल गांधी यांच्या भारत जोडो यात्रेचा खर्च हा अडीच वर्षांमध्ये कमावलेल्या भ्रष्टाचारातून होत आहे. हा पैसा कुठल्या अकाऊंटमधून खर्च होतोय याची चौकशी झाली पाहिजे, अशी मागणी त्यांनी केली आहे.

बावनकुळे म्हणाले की, भारत जोडो यात्रा म्हणजे इव्हेंट मॅनेजमेंट आहे. नेत्यांच्या मुलांना लाँच करण्यासाठी ही यात्रा काढण्याचा आरोप त्यांनी केला. शिवाय काँग्रेसमधील अनेक नेते भाजपच्या संपर्कात असल्याचं बावनकुळे यांनी सांगितलं. नागपूरमध्ये त्यांनी माध्यमांशी संवाद साधला.

Congress Rahul Gandhi in Maharashtra

हेही वाचा : कर्ज परतफेडीच्या नियोजनाचे पाच मार्ग...

काँग्रेसची भारत जोडो यात्रा काल महाराष्ट्रात दाखल झाली. काँग्रेसच्या यात्रेचं महाराष्ट्रात जल्लोषात स्वागत करण्यात आलं. तेलंगाणामधल्या मिर्झापूर येथून मशाल हाती घेवून या पदयात्रेला सुरुवात झाली. या यात्रेत मशाल हाती घेऊन हजारो काँग्रेसचे कार्यकर्ते सहभागी झाले होते. फटाक्यांच्या आतिषबाजीत महाराष्ट्राच्या सीमेवर राहुल गांधी यांचे स्वागत करण्यात आले.

राहुल गांधी हे स्वतः हातात मशाल घेवून चालत होते. प्रचंड उत्साह आणि भारत जोडोच्या घोषणांनी परिसर दुमदुमून गेला होता. मशाल यात्रेत तरुणांची संख्या लक्षणीय होती. 8 वाजून 50 मिनिटाला सुरू झालेली मशाल पदयात्रा पुढे येऊन देगलूरमध्ये पोहचली.

नंतर राहुल गांधी यांनी छत्रपती शिवाजी महाराजांच्या पुतळ्याला हार घालून सभेला संबोधीत केले. त्यावेळी त्यांनी मोदींवर टीका केली. राहुल गांधी यांनी उपस्थित लोकांना त्याचे प्रश्न मला सांगा त्यासाठीच मी आलोय असं आवाहन केलं.