Girish Mahajan : अजितदादा खरंच नाराज? महाजनांनी सांगितलं मंत्रिमंडळाच्या बैठकीला अनुपस्थित राहण्याचं 'हे' कारण

कराड : उपमुख्यमंत्री अजित पवार (Ajit Pawar) हे आजारी असल्यामुळं मंत्रिमंडळाच्या बैठकीसाठी आणि दिवसभरातील कार्यक्रमासाठी अनुपस्थित होते. त्यांचे या संदर्भात मुख्यमंत्री शिंदे, उपमुख्यमंत्री फडणवीस यांच्याशी बोलणे झाले होते. त्यामुळं ते नाराज आहेत असं म्हणण्यात अर्थ नाही, असं स्पष्ट मत ग्रामविकास मंत्री गिरीश महाजन यांनी कराड (जि. सातारा) येथे व्यक्त केलं.

मंत्री गिरीश महाजन (Girish Mahajan) सांगली जिल्ह्यातील कार्यक्रमास रवाना होण्यासाठी येथील विमानतळावर आले होते. त्यादरम्यान ते बोलत होते. महाजन म्हणाले, काल मंत्रिमंडळाच्या बैठकीसाठी मुख्यमंत्री, उपमुख्यमंत्री, मी, दिलीप वळसे-पाटील व अन्य मंत्री उपस्थित होतो. मात्र, त्यांची तब्येत खराब असल्यामुळं उपमुख्यमंत्री अजितदादा उपस्थित नव्हते.

माझ्यासमोर मुख्यमंत्री शिंदे, उपमुख्यमंत्री देवेंद्र फडणवीस यांच्याशी त्यांचं बोलणं झालं होतं. काल दिवसभर मोठ्या प्रमाणात कार्यक्रम झाले. अजितदादांच्या बंगल्यावरील कार्यकमासही ते उपस्थित नव्हते. सध्या अनेकजण यांची युती कशी तुटेल यासाठी देव पाण्यात घालून बसले आहेत. त्यामुळे ते आपापल्या पद्धतीने अर्थ काढत आहेत, असंही महाजन यांनी स्पष्ट केलं.

'आम्ही निवडणुका लांबणीवर टाकत नाही'

निवडणुका लांबणीवर टाकून सरकार निवडणुकांसाठी भीत आहे या प्रश्नावर मंत्री महाजन म्हणाले, 'निवडणुकीसाठी सरकार भीत आहे हे म्हणणे चुकीचे आहे. मात्र, निवडणुकीच्या तारखा कधी जाहीर करायच्या हा निवडणूक आयोगाचा निर्णय आहे.'