राणांसोबत जे झालं त्यावर गप्प का? फडणवीसांचा सुप्रिया सुळेंना सवाल

काल पुण्यात केंद्रीय मंत्री स्मृती इराणी यांच्या दौऱ्यादरम्यान राष्ट्रवादी-भाजपचे कार्यकर्ते यांच्यात राडा झाल्याचे पाहायला मिळाले. या आंदोलनादरम्यान भाजप कार्यकर्त्याने महिला कार्यकर्त्यावर हात उचलल्याचे समोर आले होते, यावरून राजकारण तापलं आहे. याप्रकरणावर विरोधी पक्षनेते देवेंद्र फडणवीस (Devendra Fadanvis) यांनी खासदार सुप्रिया सुळेंवर (Supriya Sule) निशाणा साधला आहे.

काल राष्ट्रवादी कॉंग्रेसने केलेल्या आंदोलनात भाजपच्या कार्यकर्त्याने महिला कार्यकर्त्यावर हात उगारला त्याबद्दल देवेंद्र फडणवीस म्हणाले की, पोलिसांच्या संरक्षणात भाजप नेत्यांवर हल्ले करणं, सभांमध्ये आंदोलन करणं, नेत्यांवर अंडे टमॅटो फेकण, केवळ आपलं राज्य आहे आपले गृहमंत्री आहेत या तोऱ्यामध्ये होत असल्याचा आरोप त्यांनी केला. आम्ही लोकशाही मानणारे लोक आहोत, त्यामुळं पहिल्यांदा तक्रार करू पण कारवाई झाली नाही तर आम्ही देखील सोडणार नाही असे फडणवीस म्हणाले.

सुप्रिया सुळेंनी पुरुष कार्यकर्त्याने हात उगारला तर हात तोडू असे विधान केले होते यावर फडणवीस म्हणाले की, सगळ्याच बाबतीत हा निर्णय घेतला पाहीजे, कारण यापुर्वी नवनीत राणांसोबत जे झालं, तसेच त्याआधी महिलांवर हल्ले झाले महिलांना पोलिसांनी वाईट वागणूक दिली त्यावेळी त्या काही बोलल्या नाहीत, ही भूमिका त्यांनी वारंवार घ्यावी आम्ही स्वागत करू असा टोला देखील देवेंद्र फडणवीस यांनी लगावला.

सुप्रीम कोर्टाने महत्वाचा निर्णय देत ज्या ठिकाणी पाऊस नसेल अशा ठिकाणी प्रलंबित निवडणूकांवर घ्या असे अदेश दिले आहेत, दरम्यान या प्रलंबित निवडणूकांविषयी बोलताना फडणवीस म्हणाले की, सात जूनला मॉन्सून येतो त्यानंतर सगळीकडे पाऊस येतो, त्याआधी निवडणूक आयोगाचं काम संपलं तर निवडणू का घेतील, त्या आधी चर्चा करणे योग्य नाही.