Devendra Fadanvis: दिल्लीमध्ये संधी मिळणार? देवेंद्र फडणवीसांनी चर्चांना दिला पूर्णविराम

मुंबई- उपमुख्यमंत्री देवेंद्र फडणवीस यांच्या दिल्लीत जाण्याच्या चर्चा अनेक वर्षांपासून रंगल्या आहेत. यावर अखेर फडणवीसांनीच प्रतिक्रिया दिली असून या चर्चांवर पडदा टाकला आहे. मी विधानसभा निवडणूक लढवणार आणि ते ही नागपूर मधूनच लढवणार असं म्हणत फडणवीसांनी चर्चांना पूर्णविराम दिला. (devendra fadnavis politician deputy chief minister of Maharashtra will contest Nagpur legislative assembly election)

देवेंद्र फडणवीस म्हणाले की, 'मी विधानसभा लढवणार आणि तेही नागपूरमधूनच लढवणार आहे. पुढचे १० वर्षे तरी मी भारतीय जनता पक्षामध्ये असेल. तसेच पक्ष जी जबाबदारी देईल ती जबाबदारी स्वीकारण्यास मी तयार आहे.' देवेंद्र फडणवीस हे नैऋत्य नागपूर विधानसभा मतदारसंघातून आमदार आहेत. त्यामुळे पुढेही ते याच मतदारसंघातून निवडणूक लढवण्याची शक्यता आहे.

राज्यात सध्या एकनाथ शिंदे हे मुख्यमंत्री आहेत. तसेच येत्या काळात शिंदे यांच्याच नेतृत्वात महायुती ही निवडणूक लढवेल असं सांगण्यात येत आहे. फडणवीस यांच्या दिल्लीत जाण्याच्या चर्चा गेल्या अनेक दिवसांपासून सुरु आहेत. फडणवीस इतर राज्यातील प्रचारासाठी जाताना दिसत आहेत. त्यामुळे फडणवीस यांना दिल्लीत पाठवण्याची तयारी सुरु असल्याचं बोललं जात होतं.

२०१९ च्या विधानसभा निवडणुकीत भाजपला सर्वाधिक जागा मिळाल्या होत्या. असे असताना फडणवीसांना सत्ता स्थापन करता आली नाही. तसेच एकनाथ शिंदे यांच्यासोबत सत्ता स्थापन करताना फडणवीस हे मुख्यमंत्री होतील अशी अपेक्षा होती. पण, पक्षाच्या वरिष्ठ नेत्यांच्या आदेशानुसार त्यांना उपमुख्यमंत्री पदावर समाधान मानावं लागलं होतं. तेव्हापासूनच त्यांना दिल्लीत संधी दिली जाईल अशा चर्चा सुरु झाल्या होत्या. (Latest Marathi News)